Таптал, Дьол уйата олохсуйбут нэһилиэгэр

Үөдэй Айыыһыт Хотун маанылаабыт үтүө дойдута, 14 Герой ийэ ууһаан тэнийэн, үөскээн, оҕо куттаах Таптал, Дьол уйата олохсуйбут нэһилиэгэ. Онон бэс ыйын 15 күнүгэр тэрээһиннээхтик буолан ааспыт уйгу-быйаҥ ыһыах Россияҕа дьиэ кэргэн уонна Айыыһыт сылынан “Айыыһыт Хотуҥҥа ыһыахта ыһыаҕыҥ” тиэмэнэн ыытылынна.

Сүрүн болҕомтоҮөһэ үрдүк Айыыларга, сир-дойду иччилэригэр сүгүрүйүү, көрдөһүү, махтаныы сиэрин-туомун толорууга  уурулунна. Ураты тыыннаах Алгыһы Айыылардыын биир ситимҥэ киирэн биир дойдулаахтарбыт Алгысчыт, норуот эмчитэ Дария Романова – Даурия – Сиэллээх Сэгэйэ, Алгысчыт Геннадий Игнатьев – Айыы оҕото, Олоҥхо тыйаатырын артыыһа, олоҥхоһут, тойуксут Яна Нюргусова, аал уоту оттон дьонноругар-сэргэлэригэр үтүөнү баҕаран, үрдүк айыылартан, сирдээҕи иччилэртэн үтүөнү көрдөһөн алгыс сиэрин-туомун толордулар. Ыһыах сүрүн бэлиэтин Ытык дуоҕаны нэһилиэк Ытык ыала Татьяна Кирсановна, Петр Михайлович Местниковтар ыһыах түһүлгэтигэр киллэрэн, нэһилиэк баһылыгар туттардылар. Баһылык Иван Гаврильев Ытык

дуоҕаны анал сэргэҕэ туруору анньан ыһыах саҕаламмытын биллэрдэ.

Үөдэй нэһилиэгин үтүө-мааны ытык ыаллара, араас сылларга улуустааҕы, республикатааҕы күрэхтэр кыайыылаахтара, Ытык ыһыах маанылаах ыалдьыттара буолан ыччаттарын, оҕолорун кытта сэлэлии хааман киирдилэр. Ол курдук, 50 сыл бииргэ олорбут Валентина, Михаил Лихановтар, Татьяна, Петр Местниковтар, маны таһынан нэһилиэкпит киэн туттар ыаллара Татьяна, Григорий Парниковтар, Наталия, Иннокентий Зыряновтар, Евдокия, Александр Новгородовтар, Мария, Петр Федотовтар уонна араас сылларга улуустааҕы “Сайдам ыал” күрэх кыайыылаахтара Вера, Эдуард Даниловтар, Марианна, Иннокентий Татариновтар, Агния, Дмитрий Яковлевтар, Надежда, Владимир Ядреевтар.

Алгыс ис хоһоонноох, сүгүрүйүү үҥкүүтүн биир дойдулаахпыт оһуохайдьыт, тойуксут Вера Цыпандина киэҥ түһүлгэни төрүттээн оһуохайы таһаарда.

Ыҥырыылаах ыалдьыттар Нам улууһун муниципальнай тэриллии баһылыгын солбуйааччы Филипп Васильевич Николаев, Үөдэй түмсүү бэрэссэдээтэлэ, Нам 1 №-х оскуолатын директора Николай Григорьевич Парников уонна Үөдэй нэһилиэгин Аҕа баһылыга Иван Васильевич Гаврильев бар дьоннорун Үрүҥ тунах ыһыаҕынан эҕэрдэлээтилэр.

Нам нэһилиэгиттэн “Ситим” III-с көлүөнэ үҥкүү бөлөҕө ырыа-үҥкүү кэһиилээх, эҕэрдэ кэнсиэри бэлэх ууннулар.

Олоҥхо тыйаатырын артыыһа, тойуксут, олоҥхоһут, Үөдэйтэн төрүттээх Яна Петровна Нюргусова П.П. Ядрихинскай – Бэдьээлэ “Дьырыбына Дьырылыатта” олоҥхотуттан быһа тардан, киин түһүлгэҕэ оллоонноон олорон толордо. Араас матыыбынан, куолаһын уларытан дьырылыта туойан, киэҥ далааһыннаахтык толорбутун дьон-сэргэ үрдүк сыанабылы биэрэн, сөҕөн-махтайан бэлиэтээтилэр.

Кыра саастаах оҕолорго “Ымыйаана Куо” күрэҕэ 5 түһүмэҕинэн ааста. Кырачаан кэрэ куолар бэйэлэрин билиһиннэрэн, талааннарын көрдөрөн, сахалыы таҥас маанытын таҥнан күрэхтэстилэр. Түмүккэ Эвелина Эверстова 1 м., Амелия Новгородова 2 м., Айнана, Кыдаана Зыряновалар 3 м. ыллылар.

“Саха ыалын тиэргэнэ” түһүлгэҕэ “Дьиэ кэргэн реликвията” быыстапка тардылынна. Дьиэ кэргэн сылыгар анаммыт быыстапкаҕа 13 дьиэ кэргэн кыттыыны ылан туоһу суруктарынан, бастыҥнар дипломунан уонна сертификаттарынан наҕараадаланнылар. Бастыҥнар ааттарыгар Галина Афанасьевна Сергеева, Наталия Егоровна уонна Иннокентий Афанасьевич Зыряновтар, Валентина Прокопьевна Лиханова, Дария Степановна Мякишева, Туйаара Николаевна Афанасьева, Влада Владимировна Эверстова, Аграфена Николаевна Яковлева ааттаннылар.

Ыһыах сүргэни көтөҕөр түгэнинэн төрүт өбүгэ оонньуулара буолан ааста. Ол курдук, төрүт ох саанан ытыыга дьахталларга Сайаана Бурцева 1 м., Сахая Дьяконова 2 м., Ольга Николаева 3 м., эр дьоҥҥо Владсард Габышев 1м., Филипп Николаев 2 м., Виссарион Бочкарев 3 м. ыллылар. “Мүһэ тардыһыыта” күрэх дьахталларга буолан ааста, бу күрэххэ Татьяна Игнатьева 1 м., Варвара Тимофеева 2 м., Айталина Дьяконова 3 м. таҕыстылар. 75 кг дылы хапсаҕайга Петр Эверстов 1 м., Егор Нафанаилов 2 м., Николай Охлопков 3 м., 75 кг үөһэ Владсард Габышев 1 м., Антон Попов 2 м., Виссарион Бочкарев 3 м. ыллылар. 75 кг дылы мас тардыһыытыгар Петр Эверстов 1 м., Арылхан Охлопков 2 м., Алексей Сергеев 3 м., 75 кг үөһэ Владсард Габышев 1 м., Виссарион Бочкарев 2 м., Иван Павлов 3 м. ылары ситистилэр. Онтон таас көтөҕүүгэ Владсард Габышев иннин биэрбэтэ, бары көрүҥҥэ курдук тыҥааһыннаах күрэххэ 1 миэстэни ылла. 2 м. Евгений Винокуров, 3 м. Петр Эверстов ыллылар.

Спортивнай күрэхтэргэ ыһыах сүрүн спонсордарынан педагогическай үлэ ветерана, нэһилиэк наставниктарын сүбэтин чилиэнэ Анастасия Семеновна Сысолятина таас көтөҕүүгэ ньирэй бирииһи туруорда. Онтон урбаанньыт Владимир Егоров уу харчынан күрэх кыттыылаахтарыгар бэлэх уунна.

Ыһыахха кэлбит ыалдьыттар, дьон-сэргэ күүстээх Алгыһы ылынан, үөрэн-көтөн, дуоһуйа сынньанан, күүс-уох ылан тарҕастылар.

Екатерина Эверстова