Бүгүн, кулун тутар 24 күнүгэр, Намнааҕы ЗАГС дыбарыаһыгар Т.К. Ядрихинская аатынан Намнааҕы социальнай-геронтологическай киин олохтоохторо Владимир Николаевич Иванов уонна Галина Николаевна Иванова үөрүүлээх быһыыга-майгыга ыал буоллулар. Кинилэри өйөөн дириэктэр Инна Иннокентьевна Сивцева, солбуйааччыта Феврония Ивановна Охлопкова, культурнай-маассабай үлэни тэрийээччи Мария Васильевна Матвеева уо.д.а. бииргэ олорор чугас доҕотторо кэлбиттэр.
Намнааҕы ЗАГС начальнига Саргылана Азарова кинилэри сокуонунан кэргэннии буолбут дьоро түгэннэринэн эҕэрдэлээн туран, эр-ойох буолбут туоһу суруктарын туттарда. Владимир Николаевич уонна Галина Николаевна кыһыл көмүс биһилэхтэрин хардарыта кэтэртилэр. Саргылана Афанасьевна сүрэхтэринэн сөбүлэһэн холбоспут дьоҥҥо бэйэ-бэйэлэрин убаастаһан, өйөһөн-өйдөһөн уһуннук дьоллоохтук олороллоругар баҕа санаатын тиэртэ.
Социальнай-геронтологическай киин үлэһиттэрэ, олохтоохторо кинилэр үөрүүлэрин тэҥҥэ үллэстэн, истиҥник эҕэрдэлээтилэр. Өйдөбүнньүк хаартыскаҕа түстүлэр.
Владимир Иванов бу кииҥҥэ Таатта улууһуттан 2021 с. кэлбит. Бэйэтэ суоппар идэлээх. Биэнсийэҕэ тахсыар диэри Тааттатааҕы киинэ ситимин, Тааттатааҕы ОДьКХ уонна «Коммунизм» совхоз салайааччыларын таспыт. Кииҥҥэ киирэн баран, бэйэтин иннинэ Амматтан кэлбит Галина Николаевнаны кытта билсэн, бодоруспуттар. Улам истиҥ сыһыан үөскээбит. Владимир эр киһи быһыытынан 2025 сыл үүнэр Саҥа дьыл бырааһынньыгар Галинаҕа ыал буоларга этии киллэрэн, сөбүлэҥин ылбыт.
Культурнай үлэни тэрийээччи Мария Васильевна бигэргэтэринэн, Владимир Николаевич киин сэбиэтин бэрэссэдээтэлэ, бары тэрээһиннэр көхтөөх кыттааччыта, олохтоохторго холобур буолар киһи. Урукку өттүгэр иккиэн ыал буола сылдьыбыт, олох очурун-чочурун ааспыт дьон. Иккиэн — инбэлииттэр.
Т.К. Ядрихинская аатынан Намнааҕы социальнай-геронтологическай киин аҕам саастаахтарга болҕомто ууруллар «Продолжительная и активная жизнь» национальнай бырайыак өйөбүлүнэн туҺанар. Владимир, Галина Ивановтар кииҥҥэ сааһыран баран киирэн, олохторугар саҥа кэрдиис кэм саҕаланар боруогар үктэннилэр. Оттон кииҥҥэ бу — бастакы дьоһун дьоллоох түгэн. Киин салалтата өйөөн, кинилэргэ саҥа аартык суолун арынарга кыаҕы биэрбит.
Саҥа тэриллибит саха ыалыгар Владимир Николаевич, Галина Николаевна Ивановтарга үгүс үөрүүлээх түгэни, уһун дьоллоох олоҕу баҕарабыт! Таптал сааһы билиммэт.
Касьян Олесов, Дарина Константинова.