Нам сэлиэнньэтигэр «eCOnam» сервиснай этэрээт оҕолор дьарыктаах буолалларыгар сайын устата 100 оҕону хабан үлэлээтэ. Оҕо үлэни кыра сааһыттан билэ улаатыахтаах. Волонтердар сайын устата Нам сэлиэнньэтин киин уулуссаларын ыраастаатылар, сквердэр сибэккилэрин көрдүлэр-иһиттилэр.
Ленскэй нэһилиэк олохтоох дьаһалтын специалиһа Анна Слепцова иһитиннэрбитинэн, бэс ыйыгар волонтер лааҕыр бастакы сезонугар 20 оҕо олохтоох дьаһалта иһинэн уонна 25 оҕо Намнааҕы бастакы нүөмэрдээх оскуолаҕа сылдьыбыт. От ыйыгар олохтоох дьаһалтаҕа 30 оҕо. Мантан 10-на “Түөлбэ” оҕо киин педагогун салалтатыгар сылдьыбыт. “Түөлбэ” киинигэр сылдьыбыттар оҕуруокка уу кутан, куруолуктары аһатан, ону тэҥэ, профориентационнай хайысханан саҥа идэлэри баһылыырга, мааста-кылаастарга сылдьан сертификат ыллылар. Онтон атырдьах ыйыгар 25 оҕо хабылынна. Оҕолору психологическай киин Намнааҕы филиалын специалистара салайан илдьэ сырыттылар. Үөрэнээччилэр араас профориентационнай диагностикалары ааһаннар ис уйулҕаны билбиттэр.
Бастакы сезоҥҥа дьоҕурдарын көрдөрбүт Лукина Настя уонна Сысолятин Ваня наҕараада ылбыттар
Тэрээһиннэргэ көхтөөхтүк кыттыбыттар дипломнарынан бэлиэтэнэллэр
"Түөлбэ" оҕо киинин иһинэн үлэлиир "Кидсбург" программанан 10 оҕо үөрэннэ, маастар-кылаастарга сылдьан сертификат туппуттар
Куруолуктары көрөллөр-истэллэр, аһаталлар
“Сервиснай этэрээт лааҕырыгар оҕолор ордук Намнааҕы киин балыыһа наркологическай кабинет быраастара, оройуон суутун профсойууһа, МАУ “Лидер” спортинструктордара, психологическай киин психологтара бэлэмнээбит сорудахтарын толорбуттарын, квест-оонньууну сөбүлээтилэр. Оҕолорбут биир сүрүн кыайыылара – Ис дьыала министерствота ыытар республикатааҕы «Таежный герой» күрэххэ кыттан 3 миэстэҕэ тиксии. Бу күннэргэ «eCOnam» этэрээт проектнай бөлөх тэринэн социальнай бырайыактары сайыннарыыга “Новые искатели” Граҥҥа кыттаары проект суруйан түмүктээн эрэр. Оҕолорбутугар кыайыыны баҕарыаҕыҥ”, – диир Анна Ильинична.
Республикатааҕы "Таежный герой" күрэххэ 3 миэстэ буолуу
Үөрэҕирии уонна наука министерствота республикатааҕы Ыһыаҕар күүс-көмө буоланнар, 10 оҕо анал сертификатынан нагараадаламмыттар. Бүтүн Россиятааҕы «Добрые крышечки» акцияҕа холбоһон пластиковай бытыылкалар хаппахтарын мунньубуттара уонна Дьокуускай куоракка киллэрэн туттарарга бэлэмнээбиттэр. «Дети против пожара» республикатааҕы акцияҕа уруһуйдаан, видеоролик оҥорон кыттыыны ылбыттар.
Үөрэҕирии уонна наука министерствота республикатааҕы Ыһыаҕар
Бүтүн Россиятааҕы "Добрые крышечки" акция
"Дети против пожара" республикатааҕы акция
Сервиснай этэрээт улуустааҕы библиотека ыыппыт «День России», «День Пушкина», «Дьиэ кэргэн» диэн тэрээһиннэргэ, викториналарга көхтөөхтүк кыттыбыт. И.Д. Винокуров-Чаҕылҕан 100 сааһыгар аналлаах видеоролик уһулларыгар нэһилиэнньэттэн интервью ыларга көмө оҥорбут. Ленскэй нэһилиэк иһинэн ыытыллыбыт стритбол күрэххэ хамаанда туруораннар 2 мисэтэни ылар чиэскэ тиксибиттэр.
Винокурова Уйгулаана уруһуйдаабыт плакаттарын уопсастыбаннай сирдэргэ тарҕатан иилбиттэр
«Нэһилиэнньэҕэ социальнай эксперименнэри ыытаннар, видеоролик таҥан таһаарбыттара уонна дьоҥҥо-сэргэҕэ тарҕаппыттара. Сэлиэнньэбит маҕаһыыннарыгар хонтуруол баар буоллун диэн санааттан икки ый профилактическай эксперименнэри оҥорорго холоммуттара. Бэлиэтээн эттэххэ, маҕаһыыннарга ый аайы хонтуруол ыытылларын наадалааҕынан аахпыттар. Маны этэн туран, атыы-эргиэн дьиэлэригэр сокуоннай саастарын туола иликтэргэ көҥүллэммэт табаардары атыылаабаттарын санатар, өйдөтөр листовкалары иилбиттэрэ. Бэйэлээх бэйэбит оҕолорбут Нам сэлиэнньэтэ саамай киртийэр сирдэригэр экологическай хайысхалаах листовкалары иилбиттэрэ, бөхтөөһүн-сыыстааһын өттүгэр улахан оруолу оонньуоҕа диэн этиигэ эрэниэххэ.
Бу курдук, Эҥсиэли хочотун, Нам сэлиэнньэтин чаҕылхай, кэнчээри оҕолоро хамнас аахсалларын таһынан, төрөөбүт дойдуларыгар бэриниилээхтэрин, олорор сирдэрин таптыылларын, көхтөөх көрүүлээхтэрин, саҥаны билэр-арыйар буолалларын көрдөрөллөр. Оҕолорбутугар саҥа үөрэх дьылыгар үрдүк ситиһиилэри, киэҥ далааһыннары баҕарабыт!” – диэн баҕа сатаатын тиэрдэр Слепцова Анна Ильинична.
Харысхан Попов