И.Е. Винокуров аатынан Хатыҥ Арыы орто оскуолата (дириэктэр П.Н. Оконешников) оҕо араас хайысханан сайдарыгар улахан болҕомтотун ууран үлэлиир. Ааспыт сылга И.Е. Винокуров аатынан историяны уонна кыраайы үөрэтэр түмэли (сэбиэдиссэй А.Х. Христофоров) уонна Хатыҥ Арыытааҕы Аппааны бөһүөлэгин олохтоох библиотекатын (сэбиэдиссэй В.Д. Носкова) кытта оскуолаҕа бииргэ үлэлииргэ сүбэлэҥ илии баттаспыта.
Ол чэрчитинэн, алтынньы 26 күнүгэр оскуола иһинэн номнуо үтүө үгэскэ кубулуйбут «Хочу все знать» өй оонньуутун 2023-2024 үөрэх сылын бастакы этаба ыытылынна. Бу күрэх чиэппэргэ биирдэ ыытыллар, кыайбыт хамаанда финалга тахсар. Финал муус устарга «День школы» тэрээһиҥҥэ буолуо. Оскуола педагог-библиотекара Айталина Эверстова иһитиннэрбитинэн:
Күрэх 5 тематическай түһүмэхтээх:
1 түһүмэх – «Э.К. Пекарскай» – ыытааччы Полина Павлова, Хатыҥ Арыы оскуолатын саха тылын уонна литературатын учуутала.
2 түһүмэх – «Улуу Өктөөп революцията» – ыытааччы Михаил Нестеров, Хатыҥ Арыытааҕы историяны уонна кыраайы үөрэтэр түмэл үлэһитэ.
3 түһүмэх – «Н.А. Лугинов» – ыытааччы Матрена Новгородова, Хатыҥ Арыы оскуолатын саха тылын уонна литературатын учуутала.
4 түһүмэх – «Саха былааҕа» – ыытааччы Варвара Носкова, Хатыҥ Арыытааҕы олохтоох библиотека үлэһитэ.
5 түһүмэх – «Ийэттэн төрүүллэр геройдар, генийдэр» – ыытааччы Айталина Эверстова, Хатыҥ Арыы орто оскуолатын педагог-библиотекара.
Уопсайа үс киһиттэн састааптаах биэс хамаанда кыттыыны ылла. Хамаандаҕа – төрөппүт, учуутал, үөрэнээччи.
Бастакы хамаанда «Көмүс» – Марфа Сивцева – төрөппүт, Александра Винокурова – учуутал, Юлианна Неустроева – үөрэнээччи.
Иккис хамаанда «Виктория» – Ирина Семенова – төрөппүт, Сергей Попов – учуутал, Жанна Семенова – үөрэнээччи.
Үһүс хамаанда «Дьулуур» – Наталья Алексеева – төрөппүт, Мария Максимова – учуутал, Вася Колесов – үөрэнээччи.
Төрдүс «Эрэл» – Ньургустана Евсеева – төрөппүт, Туяра Голикова – учуутал, Таня Ильина – үөрэнээччи.
Бэһис хамаанда «Сахалар» – Анастасия Никитина – төрөппүт, Сайыына Дьяконова – учуутал, Карина Ильина – үөрэнээччи.
Өй күрэҕэ олус интэриэһинэйдик, өрө көтөҕүллүүлээх ааста, тыҥааһыннах киирсии түмүгүнэн, «Көмүс» хамаанда кыайыылаах үрдүк аатын ылла уонна муус устарга финальнай оонньууга атын кыайыылаах хамаандалары кытта күөн көрсүө. Маннык тэрээһиннэр көлүөнэни ситимнииллэр, төрөөбүт дойдуну таптыырга үөрэтэллэр.
Надежда СИВЦЕВА