Хатыҥ Арыытааҕы оҕо искусствотын оскуолатын сэбиэдиссэйэ Александра Аркадьевна Колесоваттан РСФСР үтүөлээх, САССР норуот худуоһунньуга, Саха сирин Ленинскэй комсомол бириэмийэ лауреата, график худуоһунньук, биир дойдулаахпыт Эллэй Семенович Сивцев төрөөбүтэ 95 сылын көрсө, өрөспүүбүлүкэтээҕи «Родной край» уруһуй кэтэхтэн күрэҕин уонна оскуола үлэтин-хамнаһын туһунан билистим.
— Мин 2017 сылтан Хатыҥ Арыытааҕы оҕо искусствотын оскуолатын сэбиэдиссэйинэн ананан үлэлии сылдьабын, 12 үлэһиттээхпит, онтон 5-һэ — педагог. Биэс хайысханан оҕолору үөрэтэбит: художественнай – сал. Степанида Шамаева, хореографияҕа — Анжелика Ноговицына, флейта блогар — Ньургун Федоров, гитараҕа Егор Колосов үөрэтэллэр. Уопсайа 84 оҕо үөрэнэр, ааспыт үөрэх сылыгар, 2022-2023 сс., 38 выпускниктаахпыт: художественнай салааны -18, хореографияны -16, фортепианоны — 4 оҕо бүтэрдэ. Оскуолабыт оҕолоро Бүтүн Арассыыйатааҕы, өрөспүүбүлүкэтээҕи, улуус ыытар араас күрэхтэригэр лауреат, дипломант үрдүк аатын ылаллар.
Быйыл биир дойдулаахпыт график-худуоһунньук Эллэй Сивцев 95 сааһын көрсө, өрөспүүбүлүкэтээҕи «Родной край» уруһуй кэтэхтэн күрэҕин ыытан эрэбит. Күрэх «Нам улууһа» МТ, «Хатыҥ Арыы нэһилиэк» МТ, Намнааҕы култуура уонна духуобунас сайдыытын управлениетын, Хатыҥ Арыытааҕы оҕо искусствотын оскуолатын уонна З.П. Винокуров аатынан Намнааҕы оҕо искусствотын оскуолатын, СӨ национальнай художественнай түмэл, СӨ худуоһунньуктарын сойууһун сэбиэтин көҕүлээһиннэринэн уонна тэрийиилэринэн ыытыллыаҕа.
Күрэх 7 категорияҕа арахсар:
Бастакы категория: детсад саастаах оҕолор 6 саастарыгар диэри киирэн туран;
Иккис категория: 7 саастарыттан – 9 саастарыгар диэри;
Үһүс категория: 10-13 саастаахтар;
Төрдүс категория: 14-17 саастаахтар;
Бэһис категория: 18 саастарыттан онтон улахаттар (учууталлар, баспытааталлар, преподователлэр);
Алтыс категория: 18 саастарыттан үөһээ, устудьуоннар;
Сэттис категория: 18 саастарыттан үөһээ, любителлэр.
Киирбит үлэлэр балаһыанньаҕа эппиэттиир буолуохтаахтар. Эллэй Сивцев үлэлэрин үтүгүннэрии көҥүллэммэт. Үлэлэри сэтинньи 6 күнүттэн ахсынньы 25 күнүгэр 2023 с. диэри тутабыт. Кыттааччылар 200 солк. усунуос төлүүллэр, байыаннай дьайыы кыттыылаахтарын оҕолоро босхо кытталлар. Билиҥҥи туругунан, уопсайа 37 үлэ Дьокуускай куорат уһуйааннарыттан, Майа, Бороҕон, Ньурба, Бүлүү, Табаҕа оҕо искусствотын оскуолаларыттан, Намнааҕы техникумтан киирдэ.
Түмүктүүр тэрээһин тохсунньу 16 күнүгэр 2024 с. Дьокуускайга буолуоҕа. Икки грант-при уонна сэттэ категориянан лауреаттар, дипломаннар ааттаныахтара, маны тэҥэ анал биһирэбил дипломнар, сертификаттар туттарыллыахтара.
Түгэнинэн туһанан, бары Нам улууһун олохтоохторун, оҕолору, ыччаты бу сүдү суолталаах уруһуй күрэҕэр ким баҕалаах кыттаргытыгар ыҥырабын.
Кыттыан баҕалаахтар Шамаева Степанида Николаевнаҕа 89243678365, 8 4116223435 нүөмэрдэргэ эрийэн билсиэххитин сөп.
Александра Аркадьевна айар-тутар коллективыгар ситиһиилэри, үрдүк чыпчааллары баҕарабыт!
Надежда Сивцева