Хамаҕатта нэһилиэгэр Саха сиригэр аан маҥнайгынан аһаҕас халлаан анныгар төрүт ох саанан ытыыга дьарыктанар анал миэстэ баар буолла.
Нэһилиэк киинигэр күөх хонуулаах хотоолу күрүөлээн, анал сыаллары, ытар стендэлэри, Байанай бэлэҕэ көрүҥҥэ кыыллары туруортаан бүччүм сир табыгастаах гына толкуйдаммыт. Оҕо, улахан дьон эрчиллэригэр тус-туспа муннуктар бэлэмнэммиттэр. Ону таһынан, культурнай былаһааккалыы кыра муоста, кэрэ сибэккилэр, араас фигуралар, чөкө ыскамыайкалар ситэрэн, тупсаран биэрбиттэр.
Ол курдук, төрүт оҕунан ытыыга Россия, республика чемпионаттарын хас эмэ төгүллээх кыайыылааҕа, биллэр охчут Күндайаана Эрилик саха төрүт оҕунан ытыыта биир сэдэх, умсугутуулаах, инникилээх спорт көрүҥэ буоларынан сэҥээрээччилэр кэккэлэрин хаҥатаары ыра санаатын олоххо киллэрэр дьоро күнэ буолла. Үөрүүлээх тэрээһиҥҥэ Саха Өрөспүүбүлүкэтин саха төрүт оҕунан ытыы федерациятын бэрэссэдээтэлэ Виктор Бурцев кэлэн эҕэрдэлээтэ, таһаарыылаах дьарыктары, үтүө түмүктэри баҕарда. Улуус спортка управлениетын салайааччыта Павел Иванов улахан суолталаах дьыала саҕаламмытын, спортсмен Күндайаана Эрилик саха төрүт көрүҥүн тарҕатыыга кылаатын үрдүктүк сыаналаан “Нам улууһугар спорт сайдыытыгар үтүөлэрин иһин” бэлиэнэн наҕараадалаата. Нэһилиэк баһылыга Евгений Ушницкай охчут Уус кыыһа Күндайаана Эрилик төрөөбүт улууһун, Хамаҕатта аатын элбэхтик ааттатарын бэлиэтээн туран, бу сир бэриллибитин иһитиннэрдэ уонна спорт төрүт көрүҥүн сайыннара турарыгар баҕарда. Маны таһынан, нэһилиэк “Дьоһун саас” түмсүү, 1981 сыллаах выпусниктар, “Кытыл” түөлбэ ааттарыттан эҕэрдэлэр, баҕа санаалар этилиннилэр.
Мустубут дьон-сэргэ Дойдуга Дьиэ кэргэн сылыгар түбэһиннэрэн Харатаала аймах дьоһун дьыаланы саҕалаабыттарын, оҕо спорда сайдарыгар кылааттарын салгыы киллэрэ туруохтара диэн эрэл санааларын холбоотулар. Тупсаҕайдык оҥоһуллубут анал дьарыктанар сиргэ оноҕостор кыырайдыннар, Хамаҕаттаҕа бэргэн ытааччылар элбээтиннэр!
Мария Винокурова