Хамаҕаттаҕа төрүт ох саанан ытыы күрэхтэһиитигэр түөрт баһылык бэйэтин хамаандатын баһылаан-көһүлээн аҕалбыта, спорка баһылыктар бэйэлэринэн ылсыбыттара таһым үрдээбитин көрдөрөр.
Олунньу 3 күнүгэр охчуттар куобахтан, кустан, тииҥтэн биирин талан ыппыттара. Биллэн турар, кыраҕы харахтаахтар 3 очукуо ылаары тииҥи кыҥаабыт буолуохтаахтар диэн сабаҕалыахха сөп. Комлекснай спартакиадаҕа инники тахсарга хардыылыыллар: 1 миэстэ – Хатыҥ Арыы, 2 миэстэ – Хамаҕатта, 3 миэстэ – Ленскэй нэһилиэк охчуттара.
Ол курдук, өрөбүллэргэ төрүт ох саанан, буулдьанан ытыылар I түһүмэхтэригэр Үөдэй баһылыга Иван Гаврильев, Партизан баһылыга Алексей Зырянов, Хамаҕатта баһылыга Евгений Ушницкай, Салбаҥ баһылыга Сахаян Аргунов, 2 Хомустаах баһылыга Лев Новгородов спортсменнарыгар өй-санаа өттүнэн өйөбүл буоллулар. Бэлиэтээн эттэххэ, комплекснай спартакиада күрэхтэһиилэригэр кыттар баһылыктар кэккэлэрин Салбаҥ уонна Үөдэй баһылыктара хаҥаталлар. Аҥардас, нэһилиэк бас-көс киһитэ олохтоох спортсменнарын кытта тэҥҥэ күрэхтэһэрэ көрөргө да үчүгэй.
Нам улууһун үлэни өрө тутар дьоно-сэргэтэ култуура, спорт, үөрэх салалталара, уопсастыбаннай хамсааһыннар тэрийэр тэрээһиннэриттэн туора турбакка күүс тиийэринэн барытыгар кыттыыны ылаллара хаһыат нөҥүө тиэрдиллэр. Холобура, спорду өрө көтөҕүүгэ, киэҥник тарҕатыыга Ленскэй нэһилиэк, Модут, Көбөкөн, Таастаах баһылыктара бэйэлэринэн кэлэннэр ыалдьаллара, үлэ сөптөөх барарыгар болҕомтолорун ууруллар. Тылынан буолбакка, үлэнэн көрдөрүү буоллун.
Гаврильев Иван Васильевич, Үөдэй баһылыга:
Утарсааччыларбытын кытта ахсааммытынан тэҥҥэ испиппит. Онон, түмүкпүтүн тупсаран инники тахсыахха диэн тииҥи ытарга холоммутум.
Комплекснай спартакиада түһүмэхтэрэ быйыл элбээтэ. Нэһилиэнньэҕэ маассабай спорт баар буолуохтаах, дьон спордунан дьарыктаныахтаах. Улуустааҕы спорт управлениета маны таба көрөн, өйдөөн сөптөөх хардыы оҥорбутун биһиги өйүөх тустаахпыт.
Кырдьыга, сорох ардыгар бириэмэ тиийбэт буоларын билиннэбин. Хас нэдиэлэ ахсын дьону мунньан күрэхтэһэ кэлэр уустуктардаах. Ол эрээри, мин көрөрбүнэн билигин бары даҕаны киирэн эрэбит, орто сүнньүн булла. Бу иннинэ спартакиада тула үгүс мунньах буолбута. Биир тылга кэлии өйөөһүнтэн тахсар. Саҕалыахха эрэ наада.
Харысхан Попов
Түмүк:
1 миэстэ – Хатыҥ Арыы (66 очукуо);
2 миэстэ – Хамаҕатта (59 очукуо);
3 миэстэ – Ленскэй нэһилиэк (50 очукуо);
4 миэстэ – Намнааҕы педагогическай колледж (40 очукуо);
5 миэстэ – Үөдэй (33 очукуо);
6 миэстэ – Партизан (32 очукуо);
7 миэстэ – Көбөкөн (32 очукуо);
8 миэстэ – 2 Хомустаах (32 очукуо);
9 миэстэ – 1 Хомустаах (31 очукуо);
10 миэстэ – Түбэ (25 очукуо);
11 миэстэ – Модут (24 очукуо);
12 миэстэ – Салбаҥ (22 очукуо);
13 миэстэ – Хатырык (16 очукуо);
14 миэстэ – Бөтүҥ (11 очукуо).