Саҥа Дьылы көрсөр дьоро киэһэ Хамаҕаттаҕа бэрт сонуннук, иллээх, түмсүүлээх эйгэҕэ буолла.
Тоха, Таха, Оха, Маха (кулууп үлэһиттэрэ) диэн бэрт көрдөөх ааттаах Саҥа дьыл бэлиэтэ буолбут Хаар дьон бырааһынньык киэһэтэ саҕаланыаҕыттан бүтүөр диэри көрү-нары көҕүлээтилэр.
Баһылык солбуйааччыта Владилен Москвитин ситиһиилэри санатан, үүнэр сылга нэһилиэк сайдар суолларын ыйан эҕэрдэтин анаата.
Нэһилиэк тэрилтэлэрэ, салайааччылара бэйэлэринэн олоххо, үлэҕэ баар түгэннэртэн киинэлэринэн, остуоруйаларынан представлениелары аныгылыы, көрдөөхтүк туруоран кытыннылар.
Дьоро киэһэни СӨ народнай артыыһа Александр Емельянов, ырыаһыттар Константин Степанов, Макар Лебедев, Святослав Эверстов ырыаларынан киэргэттилэр.
Саҥа дьыллааҕы алыптаах киэһэҕэ СӨ культураҕа уонна духуобунай сайдыыга миниистирэ Афанасий Ноев ыалдьыттаабыта дьоһун суолталанна, хамаҕатталар ыра санаалара туоларыгар сааланы толору мустубут олохтоохторго эрэли үөскэттэ.
Буор босхо Ыһыах түһүлгэтигэр мустар курдук бар дьон аймахтардыын, доҕоттордуун, бүтүн нэһилиэгинэн көрсүһэн, ааһан эрэр сылы этэҥҥэ атаарар, саҥа сылга үктэнэр, үөрүүлэрин үксэтэр кэрэ киэһэ олус бэрка да ааста!
Тупсаҕай киэргэтиилээх, күлүмнүүр уоттардаах, киэргэтэр экраннаах сынньалаҥ дьиэтэ ыалдьыттары ыҥыра-угуйа турдун!
Мария Винокурова, Хамаҕатта