Атырдьах ыйын 1-9 күннэригэр Москва уобалаһын Солнечногорск куоратыгар Бүтүн Россиятааҕы «Территория смыслов» диэн үөрэх форума саҕаланна. Бу киэҥ ыҥырыылаах форумҥа РФ бары субъектарыттан 2000-тан тахса кыттааччы кэлбит.
Тэрээһин «Россия — страна возможностей» президент платформатын үөрэҕин киинигэр «Сенеж» салайар мастарыскыайга ыытыллар. Бу форумҥа Түбэ нэһилиэгиттэн Пестряковтар дьиэ кэргэттэрэ улахан тургутууну ааһан, Саха сириттэн соҕотох кытта тиийдилэр.
Кинилэр сынньалаҥы кытта үөрэҕи тэҥҥэ дьүөрэлээн, оҕолорун кытта форум дьиэ кэргэн симиэнэтигэр кытталлар. Эдэр ыал бизнестэрин билиһиннэриэхтэрэ, оҕолорун дьарыктарын кэпсиэхтэрэ.
Дьиэ кэргэн аҕа баһылыга Иосиф Иннокентьевич шиномонтаж арыйан үлэлээбитэ ыраатта. Быйылгыттан автостоянка үлэлэтэр, ыал ийэтэ Лючия Васильевна «Үрүҥ Күөл» диэн ыалдьыттары көрсөр саха балаҕанын арыйан үлэтин саҕалаата.
Оҕолоро Колялаах Алиса куурусса көрөн-истэн нэһилиэккэ сымыыт атыылыыллар.
Бу форумҥа эдэр ыал Пестряковтар дойдубут ыччатын кытта алтыһан элбэх саҥаны билэн-көрөн, олохторугар, дьарыктарыгар туһаныахтара турдаҕа.
Санаттахха, Пестряковтар бэс ыйыгар Владивосток куоракка Бүтүн Россиятааҕы «Это у нас семейное » президент платформата ыытар күрэҕэр кыттан элбэх номинация хаһаайыннара буолбуттара. Ол бириистэрин бу күннэргэ тутан үөрүүлэрэ муҥура суох. Ол курдук, дьиэҕэ-уокка туттуллар олус наадалаах тэриллэр бэлэх буолан кэлбиттэр.
«Эҥсиэли» хаһыат