Нам улууһун киин балыыһатын кылаабынай бырааһа Ариан Николаевич Сергеев бу сыл тохсунньу ыйыгар Түбэ нэһилиэгэр кэлэн биирдиилээн дьону көрсөн, ирэ-хоро кэпсэтэн барбыта. Онно тиис быраастарыгар кыайан суруйтарбат, уочаракка тиксибэт буолуу, госуслуганан талон ылар ыарахаттардааҕын, эрэйдээҕин туһунан боппуруос сытыытык турбута.
Улуус отчуоттуур мунньаҕар биһиги хоту сытар, түгэх нэһилиэк Түбэ дьоно-сэргэтэ бу боппуруоһу эмиэ туруорсубуппут. Ол түмүгэр, бу ый 10 күнүттэн 14-кэ диэри стоматолог быраас Надежда Николаевна Огонерова уонна кини сиэстэрэтэ Светлана Семеновна Новгородова дьиэ кэргэттэрин хаалларан туран, нэһилиэкпитигэр кэлэн 5 күҥҥэ үлэлээн, киһи бөҕөнү көрөн, тиистэрин эмтээн бардылар. Нэһилиэк олохтоохторо, элбэх оҕолоох, саастаах, техниката суох дьон бары маннык кэлэн үлэлээбиттэригэр махталбыт муҥура суох. Өссө да кэмиттэн кэмигэр бу курдук выездтар оҥоһуллуохтара диэн эрэнэ хааллыбыт.
Түгэнинэн туһанан кылаабынай бырааспытыгар Ариан Николаевичка, биһиги этиибитин ылынан туһааннаах дьоннору командировкалаан ыыппыккар истиҥ махталбытын тиэрдэбит!
Үлэҕитигэр өссө элбэх ситиһиилэри, дьиэ кэргэттэргитигэр бигэ туругу, доруобуйаны, дьолу баҕарабыт!
Полина Шестакова