Уран тыл алыба, кэрэтэ,
Ырыаһыт сөҕүмэр талаана —
Түҥ былыр төрүттээх өбүгэм
Төлөннөөх сүрэҕэ — олоҥхо
(Екатерина Чехордуна)
Түбэ нэһилиэгэр сэһэннээх сэтинньи 24 күнүгэр, Олоҥхо күнүн көрсө, «Уһуйааҥҥа олоҥхо күнэ» тэрээһин буолан ааста. Түбэтээҕи олохтоох модельнай библиотека көҕүлээһининэн, П.А. Ойуунускай таҥан, чочуйан хаалларбыт «Дьулуруйар Ньургун Боотур» улуу олоҥхо сүрүн геройдарын Түбэ эдэр ийэлэрэ илиигэ кэтиллэр куукула гына тигэн оҥордулар. Оҕолорго Олоҥхону кылгатан, сүрүн ис хоһоонун арыйар тэттик театр көрдөрдүбүт. Иитиллээчилэр олус диэн сэргээн, болҕойон иһиттилэр. Бэйэлэрин ийэлэрэ тикпиттэрин истэн үөрүүлэрэ өссө үрдээтэ.
Олоҥхо сүрүн персонажтара:
1. Саха Саарын Тойон — Охлопкова Любовь Васильевна, Федорова Сахаяна Николаевна
2. Сабыйа Баай Хотун — Дьяконова Амана Павловна
3. Күн Дьирибинэ — Шестакова Полина Алексеевна
4. Туйаарыма Куо — Саввинова Айталина Петровна
5. Абааһы бухатыыра — Григорьева Людмила Савельевна
6. Абааһы Кыыһа — Аргунова Сардаана Дмитриевна
7. Үрүҥ Уолан — Птицына Александра Николаевна
8. Ньургун Боотур — Егорова Татьяна Валерияновна
9. Айыы Умсуур удаҕан — Федорова Александра Григорьевна.
Төрөппүт кыттыылаах сонун тэрээһин ааста диэн бэлиэтээн эттилэр. Бары кыттыыны ылбыт ийэлэргэ, «Түбэчээнэ» уһуйаан иитээччилэригэр махталбын биллэрэбин, кырачааннарга олоҥхо — саха норуотун тылынан уус-уран айымньытын саамай үрдүк чыпчаала буоларын ис сүрэхпититтэн иҥэрдибит.
Людмила Григорьева, библиотека сэбиэдиссэйэ