Бүгүн Түбэҕэ «Нам улууһа» МТ дьаһалтатын 2023 сыллаах үлэтин отчуотугар нэһилиэк 45 олохтооҕо кыттыыны ылла. Видеонан отчуот кэнниттэн Юрий Дьяконов ааспыт сыллааҕы отчуокка киирбит ыйытыыларга, туруорсууларга туох үлэ барбытын билиһиннэрдэ.
Улууспут хоту эҥэригэр сытар кытыы нэһилиэк олохтоохторо улуус дьаһалтатын иккис бөлөҕүн салайааччытын, баһылыгы социальнай боппуруостарга солбуйааччы Юрий Дьяконовы, кинини кытта кэлсибит тэрилтэлэр салайааччыларын, эппиэттээх үлэһиттэри кытта аһаҕастык кэпсэттилэр.
Тыа сиригэр үүтү, эти дэлэтэргэ, сүөһү төбөтүн элбэтэргэ усулуобуйа тубустаҕына эрэ кыаллара биллэр. Ол сиэринэн, нэһилиэк туруктаах «Кулаада» бааһынай хаһаайыстыба салайааччыта Радик Лукин саҥа туппут хотонугар сүүрэн-көтөн, элбэх харчыны кутан гаас киллэтэрбитин, «Сахатранснефтегаз» АО үлэһиттэрэ араарбыттарын, ону холботторорго улуус дьаһалтата кыттыһарын уонна эдэр сүөһүгэ анаан тутар хотонугар болҕомтону уурарга, өссө сүөһү көрөөччү дьиэтин туттар былаанын өйүүллэрин туруоруста.
Олохтоохтор Үрүҥ Күөлү харыстыырга үлэни күүскэ ыытарга, балыктыырга үптээх-харчылаах программа оҥоһулларын, оскуола тутуутун, детсад дьиэтин өрөмүөнүн, оскуола музейын үлэһитигэр хамнас көрүллэрин, оскуола библиотеката сахалыы кинигэнэн хааччыллыытын, урбаанньыттар бэйэлэрин кыһалҕаларынан программаларга хайдах хапсыахтарын сөбүн о.д.а. көрсөр кыһалҕаларын туруорустулар. Ити курдук, барыта 14 киһи бэйэтин санаатын эттэ, туруосуулары оҥордо.
Юрий Дьяконов бары этиилэр боротокуолга киирбиттэрин, инники өттүгэр ол болҕомтоҕо ылыллан үлэ барыаҕын аҕынна. Улуус сэбиэтин дьокутаата Владимир Макаров ааспыт сылга ыыппыт үлэлэрин билиһиннэрдэ.
Түбэлэр улуус дьаһалтатын 2023 с. үлэтин биһирииллэрин 100% куоластаан бигэргэттилэр.
Касьян Олесов-Олук