Кэлэн иһэр Сомоҕолоһуу күнүн көрсө, сэтинньи 1 күнүгэр, Бөтүҥҥэ, С.П. Оконешников аатынан «Айылгы» культура киинигэр,
ыччаттарга улуустааҕы «БУМ-БытьУмнымМодно» интеллектуальнай КВИЗ оонньуу буолан ааста.
Оонньууга Түбэ, Хатырык, Бөтүҥ
ыччаттарын хамаандалара кыттыыны ыллылар.
Барыта 5 түһүмэхтээх өй күрэһэ бэйэни билиһиннэрииттэн саҕаланна. Иккискэ «Нам улууһун историята» викторинаҕа кииристилэр. Үһүскэ бэриллибит 4 хаартысканан тыллары таайдылар. Төрдүскэ Сомоҕолоһуу тематыгар «Бары бииргэ» видеоролик оҥорбуттарын көрдөрдүлэр. Бэһискэ Нам улууһун биллэр дьоно видеонан ыйытыыларыгар хоруйдаатылар.
Оонньууну сыаналыыр дьүүллүүр сүбэҕэ Екатерина Евстафьева, улуустааҕы дьиэ кэргэн уонна ыччат политикатын отделын салайааччыта, Алтыына Шапошникова, А. Шестаков аатынан норуот айымньытын дьиэтин методиһа, Туяра Петрова, А. Шестаков аатынан норуот айымньытын дьиэтин культурнай-маассабай тэрээһиннэри тэрийэр отдел сэбиэдиссэйэ үлэлээтилэр.
Өй күрэһэ олус көхтөөхтүк, интэриэһинэйдик барда.
Түмүккэ «Самая сплоченная команда» ааты
Хатырыктан «Махсыым ыччаттара» ылан Дипломунан, улуустааҕы ыччат управлениетын бирииһинэн,
«Креатив» ааты Бөтүҥ хамаандата ылан Дипломунан, Афанасий Шестаков аатынан улуустааҕы норуот айымньытын дьиэтин бирииһинэн бэлиэтэннилэр.
Кыайыылааҕынан Түбэ «Эрэл» ыччат хамаандата буолла уонна Дипломунан, тэрийээччилэр бириистэринэн наҕараадаланна.
КВИЗ-оонньууну бэйэлэрин ырыаларынан, үҥкүүлэринэн киэргэттилэр: талааннаах ыччаттарбыт Сардаана Харитонова (Түбэ), Владимир Захаров — Барылан Бахсы Күн уола (Хатырык), ыччат үҥкүү бөлөҕө (Бөтүҥ).
Бу күн эдэр дьон бэйэ-бэйэлэрин кытта билсиһэн, алтыһан, сынньанан, билиилэрин хаҥатан тарҕастылар.
Инникитин да маннык көрсүһүүлэр ыытыллан, ыччаттар биир сомоҕо буолан үүнэ-сайда турдуннар.
Валентина Колесова, Бөтүҥ модельнай библиотекатын сэбиэдиссэйэ