Граф Биэрэгин Затоннааҕы ситэтэ суох орто оскуолатын коллектива, үөрэнээччилэр, төрөппүттэр байыаннай дьайыыга сылдьар байыастарга анаан маскировочнай сетка өрөн бүтэрдилэр.
Дириэктэри иитэр-үөрэтэр чааска солбуйааччы Саргылана Сметанина иһитиннэрбитинэн, Хатыҥ Арыы нэһилиэгин баһылыга Иван Ноговицын ыҥырыытын ылынан, оскуола үлэһиттэрэ харчы хомуйуутугар кыттыһаннар, дьонтон ыйыталаһан, материал ылан, маскировочнай сетка өрөн саҕалаабыттар.
Саргылана Петровна сатабыллаах салайыытынан күүстээх үлэ ыытыллыбыт. Куоракка киирэн «Илии сылааһа» доброльческай сыахтан ыйыталаһан, сүбэлэтэн, куоракка маскировочнай сетка өрүүтүнэн дьарыктанар общественник дьону булбуттар.
Ол курдук, куоракка Курашова 28/2, Бестужево-Марлинского 5, корпус 1 (Досааф), Дзержинского 62 маскировочнай сетка өрүүтүнэн дьарыктанар дьону көрсөн сүбэ-ама ылбыттар. Салгыы “Столичный” рыноктан «М Видео» маҕаһыынтан уоннуу миэтэрэлээх икки маҥан сетканы ылбыттар. Биир сетка сыаната 1600 солк. Намтан «Меркурий» маҕаһыынтан икки сеткаҕа сөп буолар 40 миэтэрэ спанборд маҥан материал атыыласпыттар, сыаната 1 м — 75 солк., бу таҥас сииги киллэрбэт, чэпчэки уйумтуо эбит. Өрүллүбүт сетка таҥаһын быыһыгар камуфляжнай таҥаһы 3 см гына кырыйан кыбыппыттар.
Оскуола үлэһиттэрэ, төрөппүттэр уонна үөрэнээччилэр буолан сарсыардаттан киэһээҥҥэ диэри икки күнүнэн уопсайа икки сетканы өрөн бүтэрбиттэр. Аны сеткаларга мөһөөччүк тигиэхтээхпит диэн Саргылана Петровна кэпсээнин түмүктээтэ.
Түмсүүлээх буоллахха – үлэ кыайыылаах!
Надежда Сивцева