М.К. Аммосов аатынан Култуура уонна духуобунай сайдыы дыбарыаһыгар икки өйдөһөр, таптаһар сүрэхтэр дьоллорун холбуур ЗАГС саалатыгар үбүлүөйдээх ытык ыаллары бэлиэтиир дьоро күн ахсынньы 5 күнүгэр буолан ааста. Бу күн Нам улууһун кыһыл көмүс дьиэ кэргэттэрэ 50, 55, 60 сыл бииргэ өйдөһөн-өйөһөн олорбуттарын бэлиэтээн, эҕэрдэ үөрүүлээх, кэтэһиилээх түгэнэ ыытылынна.
Ол курдук, 50 сыл бииргэ олорбут ыаллар Хатыҥ Арыы нэһилиэгиттэн Любовь Ефимовна, Николай Алексеевич Аммосовтар, Үөдэй нэһилиэгиттэн Валентина Прокопьевна, Михаил Николаевич Лихановтар, Фрунзе нэһилиэгиттэн Галина Егоровна, Дмитрий Степанович Парниковтар, Ленскэй нэһилиэгиттэн Надежда Федоровна, Валерий Николаевич Поповтар, 55 сыл бииргэ олорбут ыаллар Партизан нэһилиэгиттэн Мария Ивановна, Василий Васильевич Сыромятниковтар, Ленскэй нэһилиэгиттэн Фекла Степановна, Борис Васильевич Суздаловтар уонна 60 сыл бииргэ эйэ-дэмнээхтик олорор Ленскэй нэһилиэгин олохтоохторо Екатерина Павловна, Федор Федорович Павловтар.
Ытык ыаллары Нам улууһун ЗАГС отделын салайааччыта Саргылана Азарова эҕэрдэлээн туран, “Кыһыл көмүс дьиэ кэргэттэр” Бочуот кинигэтигэр киирбит туоһу сурукка илии баттатта. Нам улууһун баһылыгын социальнай боппуруостарга солбуйааччы Юрий Вячеславович Дьяконов Саха сиригэр “Дьиэ кэргэн килбиэнэ” кыһыл көмүс өҥнөөх анал бэлиэни уонна СӨ Ил Дархана илии баттааһыннаах туоһу суругу, маны таһынан, Нам улууһун баһылыга Юрий Слепцов олохтооһунунан улуус уонна нэһилиэктэрэ анаабыт 50-55-60 тыһыынча суумалаах сертификаты ытык ылларга эҕэрдэлээн, махтанан туран туттарда.
Дьиэ кэргэн уонна ыччат политикатын отделын начальнига Екатерина Евстафьева Дьиэ кэргэн сылынан икки ытык куба холбоһон олорор остуолга ууруллар сүрэх бэлиэни аҕам саастаах үбүлүөйдээх көмүс ыалларга бэлэх уунна. Нэһилиэктэр баһылыктара, бэрэстэбиитэллэрэ, оҕолоро истиҥник эҕэрдэлээн, сибэкки дьөрбөтүн, сэмэй бэлэхтэрин туттардылар.
Кэрэтик сааһырыы, уһуннук бииргэ олоруу, оҕо-уруу төрөтөн, ууһатан, олоххо бигэ тирэхтээх буолуу — бу дьол. Олох дьиҥ чахчытын, кэрэтин, ньулуунун билбит, муударай, кэрэ мөссүөннээх, үлэ-хамнас кытаанаҕын ааспыт аҕам саастаах пааралар хайдах эрэ бэйэ-бэйэлэригэр махтаммыт, үөрбүт харахтара элбэҕи да кэпсиир… Этэҥҥэ буолун, уһун үйэлэнин ытык-мааны ыалларбыт.
Екатерина Эверстова