Нам улууһугар үгэскэ кубулуйбут нэһилиэктэр икки ардыларыгар ыытыллар комплекснай спартакиада I түһүмэҕэ тохсунньуттан саҕаламмыта.
“Быйылгы комплекснай спартакиадабыт күрэхтэһиилэрэ III түһүмэхтээх. III түһүмэх сайыҥҥы спартакиаданан түмүктэниэхтээх. Оттон IV түһүмэххэ сүүмэрдэнэн тахсыбыт бастыҥ хамаандалар Кубок ылар иһин киирсиэхтэрэ”, – диир улуустааҕы спорт управлениетын салайааччытын солбуйааччы Сергей Софронов.
Сайыҥҥы спартакиадаттан улуус сүүмэрдэммит хамаандата тахсан “Манчаары оонньууларыгар” дьарыгын олохтоохтук саҕалыаҕа.
“Манчаары оонньуулара” чугаһаабытынан, нэһилиэк спортсменнара үс түһүмэх устата саха национальнай көрүҥнэригэр күрэхтэһиэхтэрэ. Спорт управлениета улуустааҕы спартакиада I түһүмэҕин кэлэр нэдиэлэҕэ бүтэрээт, үргүлдьү II-кэ ааһыахтара. IV түһүмэххэ улуус аҕыс күүстээх хамаандата Кубок иһин салгыахтара. Волейбол, мини-футбол, дартс, остуол тенниһэ, баскетбол оонньуулара күһүөрү кыһын буолуохтара.
Бүгүҥҥү күҥҥэ I түһүмэҕи кэтээн көрүүнэн, күрэхтэһээччилэр, ыалдьааччылар, көрөөччүлэр уоту саҕан сэҥээрбиттэрэ билиннэ. Сергей Анатольевич иһитиннэрбитинэн, I-кы түһүмэххэ кэккэ биричиинэнэн кыттыбатах спортсменнар II-кэ күрэхтэһэллэрэ күүтүллэр. Оттон хотторууну билбиттэр аныгыс көрсүһүүлэргэ ох курдук оҥостоллор, бэйэлэригэр сыал-сорук туруораннар кыайыахха наадатын этинэллэр эбит. Холобура, урут биирдэ-иккитэ күрэхтэһэн баран тохтоон хаалар эбит буоллахтарына, быйыл хартыына чыҥха атын буолбута көһүннэ.
Хамаандалар икки ардыларыгар күрэстэһиини сытыырхатаары, Үөдэй нэһилиэгэ улахаттартан 2-с бөлөххө көспүт. Оттон Бөтүҥ, Көбөкөн 3-кэ киирсиэхтэрэ. Дьэ, толкуйдаммыт быһаарыныы буолбут.
Күрэхтэһиигэ нэһилиэктэр кыттыыллара сытыырхайар. Холобура, хас биирдии күрэхтэһиигэ кыттааччы ахсаана 100-тэн түспэт буолла. Туоһулуур буоллахха, билигин куйаар ситимэ муҥутуу сайдыбыт кэмигэр, нэһилиэктэр спорт саалаларыгар спортинструктордар дьону түмэн дьарык ыыталларын спорт управление билэ олорор.
Күрэхтэһиилэргэ баһылыктар быһаччы кыттыһар буолбуттара хайҕаллаах: интэриэһэргииллэр, ыалдьаллар, спортсмен быһыытынан кыттыыны ылаллар. Ити курдук нэһилиэги сирдээччи дьон үгүстэрэ спорка чугаһаабыттара бэлиэтэнэр. Бу буолар спорт – эйэ, спорт – доҕордоһуу! Баһылыктар сөпкө өйдөөннөр күүс-көмө буолалларыгар спорт управлениета махтанар.
Барыта эриэ-дэхситик туох да тахсыбат. Сиһилии ырыттахха, маҥнай хамсааһын салааската бытааннык, ыараханнык хоҥнубута. Спартакиадаҕа сыһыаннаахтар санаалара икки аҥыы хайдыспыта: III түһүмэх тухары хайдах кэлэн кыттабыт диэн саарбаҕалааһын. Оттон билигин хайдаҕый? Улуус холбоһон бары биир долгуҥҥа киирэн эрэриттэн үөрэбит.
Салайааччы мунньаҕы баһылаан-көһүлээн бэйэтин этиитинэн ыыттаҕына, үлэһит санаата, этэр этиитэ, толкуйа төннүөн сөп. Урут даҕаны, билигин даҕаны үлэһиттэри болҕомтолоохтук быһа түспэккэ истэр салалталар бааллар. Дьэ, мантан туһалаах этиилэр тахсан кэллэхтэрэ ол. Холобура, спорт управлениетын сүбэ мунньаҕар спортинструктордар этэр этиилэрэ, туруорсуулара болҕомтоҕо ылыллара көстөр. Ол эрээри, наһаа тиэрэ түһэр эмиэ сөбө суох.
Сергей Софронов, улуустааҕы спорт управлениетын салайааччытын солбуйааччы:
— Баһылыктар, спортинструктордар управлениеҕа кэлэннэр II-с түһүмэх хаһан саҕаланарын, хайдах быһыылаахтык буоларын ыйыталлар, интэриэһэргииллэр. II-с түһүмэххэ кыра уларыйыы баар буолуоҕа, эбии-сабыы тахсыан сөп.
Урукку сылларга Көбөкөн көтүтэр эбит буоллаҕына, билигин көтүппэккэ киирсэ сатыыр. Биир хомолтолооҕо, инники күөҥҥэ сылдьыбыт Арбын нэһилиэгэ, кэккэ биричиинэнэн сорох көрүҥнэри куоттарда. Утарсыы оҥорор, күрэстэһии үөскэтэр нэһилиэк II, III-с түһүмэхтэргэ күүстээхтик киирсэригэр бүк эрэнэбит.
I-кы түһүмэхтэн улуус хамаандатыгар сүүмэрдээһин саҕаланна диэххэ наада. Ол курдук, кулун тутартан өрөспүүбүлүкэ чемпионаттара саҕаланыахтара. Бүгүҥҥү күн туругунан, хапсаҕайга, гиирэ спордугар, мас-рестлиҥҥэ хамаандалар турдулар.
Кыайыы уола Харысхан