Улууска Оҕо спордун сыла ситиһиилэринэн саҕаланна

Намнааҕы Ньургун Тимофеев аатынан өрөспүүбүлүкэтээҕи олимпийскай эрэл оскуолатын иитиллээччилэрэ чэпчэки атлетикаҕа Саха сиригэр бастыыр иһин күрэхтэһиигэ 2 кыһыл, үрүҥ көмүс, 2 боруонса мэтээллэри ылбыттар.

Ол курдук, тохсунньу 20-21 күннэригэр 2007-08, 2009-10 сыллаах төрүөх оҕолорго 295 кыттааччылаах 24 хамаанда күрэхтэспитин тренер Николай Кейметинов этэр. Уһуну уонна үс төгүл үс ыстаныы түһүмэхтэригэр Матвеева Настя иннин кимиэхэ да биэрбэтэх. Бэлиэтээн эттэххэ, Настя чэпчэки атлетикаҕа Саха сирин сүүмэрдэммит хамаандатыгар киирэр. Салгыы, Нам улууһугар Ядрихинскай Кирилл уһуну ыстаныыга үрүҥ көмүс, Парников Сайдам 800 м сүүрүүгэ боруонса мэтээллэри аҕаллылар.

“Кыайыы, ситиһии өр сыллаах дьарыктаныыттан, үлэттэн, бэйэни бэрээдэктэнииттэн кэлэр. Тэтими ыһыктыбакка салгыы дьарыктаныахпыт. Оҕо үтүө түмүгү көрдөрөрүн ыксатымыахха, тиэтэтимиэххэ наада. Күрэхтэһиигэ спортсмен толору бэлэм буоллаҕына бэйэтин көрдөрүөҕэ”, – диир тренердэрэ Николай Кейметинов.

***

Дьокуускайга тохсунньу 18-21 күннэригэр дуобакка оҕолорго өрөспүүбүлүкэҕэ бастыыр иһин күрэхтэһиигэ классическай сүрүн түһүмэхтэрэ буолан ааспыт. “Олимпик” спорт оскуола иитиллээччилэрэ ситиһиилээхтик кыттыбыттар.

Дуобатчыттар бастыҥтан бастыҥ турнирдарыгар Василиса Гаврильева 1 очконан хаалан 3 миэстэ буолбутун тренерэ Надежда Протопопова этэр. Ол курдук, спорт оскуола иитиллээччилэрэ бэйэлэриттэн икки сыл аҕа оҕолору кытта тэҥҥэ оонньообуттар.

“256 күрэхтэһээччилээх турнир оҕолорбутун элбэххэ үөрэтэр. 4 кылаас үөрэнээччитэ Олесов Саян, Амбросьева Арина (2 кыл.), Массаев Алеша (1 кыл.), Терешкина Ангелина (4 кыл.) эрэли саҕар оонньооччулар буолалларын бу күрэхтэһиигэ көрдөрдүлэр, дакаастаатылар”, – диир Надежда Георгиевна.

Харысхан Попов