Быйыл 2024 сыл сааһыгар халаан уутуттан улууспут Хатырык, Маймаҕа, Модут, Бөтүҥ, Граф Биэрэгэ о.д.а. нэһилиэктэрэ эмсэҕэлээбиттэрэ. Аны ыам ыйыгар өрөспүүбүлүкэбитигэр халаан уутуттан ыксаллаах быһыы-майгы режимэ биллэриллибитэ.
Нам улууһун үөрэх управлениетыгар иһитиннэрбиттэринэн, СӨ үөрэххэ уонна наукаҕа министиэристибэтин өйөбүлүнэн ити нэһилиэктэр 374 оҕотугар анаан киэҥник биллэр «Океан», «Жемчужина», «Бэс чагда» лааҕырдарыгар уонна «Наука кыра Академиятыгар» («МАН») бэс, от уонна атырдьах ыйдарыгар сынньанар кыаҕы биэрдэ.
Ол курдук, Нам улууһуттан бэс ыйын 20 күнүттэн 73 оҕо «Океан» лааҕыр «Бригантина», «Парус», «Тигренок», «Китенок» дружиналарга тарҕаһан сынньана, доруобуйаларын чэбдигирдэ сылдьаллар. Оҕолор лааҕыр үөрэтэр, аралдьытар уонна спортивнай программаларыгар астына-дуоһуйа кытталлар. Оттон «Океан» оҕо киинин баһаатайдара, педагогтара уонна үлэһиттэрэ бары өттүнэн оҕолорго көхтөөх уонна туһалаах сынньалаҥы хааччыйаллар. Кинилэр оҕолорго кыһамньылаахтык, болҕомтолоохтук сыһыаннаһаллар.
«Океан» Бүтүн Россиятааҕы оҕо киинэ — оҕолорго социальнай реабилитацияны ыытарга баай опыттаах. Бу оҕо киинэ – сынньанарга айымньылаах эйгэни үөскэтэр, элбэх кэрэ түгэни бэлэхтиир, үтүө өйдөбүлү хаалларар уонна оҕолор инники олохторугар ситиһиилээх суолу арыйар! Бэс ыйын 25 күнүгэр «Океан» Бүтүн Россиятааҕы оҕо киинигэр VIII-c симиэнэ үөрүүлээх аһыллыыта ыытылынна.
Касьян Олесов-Олук