Ахсынньы 9 күнэ – Аҕа дойду Дьоруойдарын күнэ. Бу күн эйэлээх олох туһугар сэриигэ кыттыбыт буойуннарбытын ахтан-санаан ааһар, махтанар күн. 1 Хомустаах нэһилиэгэр байыаннай дьайыыга сылдьыбыт биир дойдулаахтарыгар аналлаах “Умнубаппыт, киэн туттабыт!” патриотическэй чаас ыытылынна. Бу туһунан 1 Хомустаах «Эйгэ» модельнай библиотеката суруйар. Библиотека ааҕар саалатыгар байыаннай дьайыы кыттыылаахтарын төрөппүттэрэ, дьиэ кэргэттэрэ, Д.Ф. Алексеев аатынан орто оскуола учууталлара, үрдүкү кылаас үөрэнээччилэрэ, нэhилиэк общественноhа кыттыыны ылбыттар.
Тэрээhин бастакы чааhа «Хомустаах Ньургуннара» оскуола үрдүкү кылааhын уолаттарын уус-уран дьүhүйүүлэринэн саҕаламмыт, ол кэнниттэн сырдык тыыннара быстыбыт биир дойдулаахтарын чиэстээн биир мүнүүтэлээх тохтобул биллэриллибит.
Дойдуларын туһугар сырдык тыыннарын толук уурбут хорсун-хоодуот уолаттарын үөрэппит учууталлара, доҕотторо, бииргэ үөрэммиттэрэ, коллегалара үтүө тылынан ахтан-санаан ааспыттар: Ньургун Федорович Новгородов туһунан «Эрэл» ыччат тумсуутугэр бииргэ улэлээбит Т.А. Алексеева, Попов Роман Романович; Абдульманов Владимир Валентинович туһунан оскуолаҕа бииргэ үөрэммит доҕотторо Т.А. Жиркова, А.Г. Захаров; Николай Николаевич Березкин туһунан үөрэппит учуутала А. А. Томская; Терентьев Евгений Гаврильевич туһунан кэргэнэ Евдокия Валерьевна; Иван Григорьевич Гореев туһунан кэргэнэ Таисия Гаврильевна, “Улыбка” оҕо уһуйааныгар бииргэ үлэлээбит коллегата Л.Н. Попова; Яковлев Иван Иванович туhунан эдьиийэ Н.Д. Жиркова. Биир дойдулаахтара, байыаннай дьайыы ветерана, «Боотур» этэрээт байыаhа Дмитрий Колесов байыаннай эпэрээссийэ, бииргэ сулууспалаабыт уолаттарын хорсун быһыыларын туһунан кэпсээбит.
— Биһиги нэһилиэкпититтэн байыаннай дьайыыга кыттыбыт, ону тэҥэ сэрии толоонугар охтубут буойуннарбыт сырдык ааттарын үйэтитэр сыаллаах өйдөбүнньүк стела туһунан «Хомустаах 1-кы нэһилиэгэ» МТ баһылыгын солбуйааччы А. Г. Захаров, олохтоох дьаһалта специалиһа В. В. Ушаков уонна библиотека сэбиэдиссэйэ Н.Д. Жиркова кинигэ тахсыытын туhунан сырдаттылар.
Саха суруйааччыта Серафим Кулачиков-Эллэй “Герой ийэтигэр” хоһоону нэһилиэкпит ыччата Александр Рязанскай ааҕан, Елена Каменева “Милая мама” ырыаны ыллаан, кэлбит дьон сүрэҕин уйадыттылар. Бу түгэҥҥэ буойуннарбыт ийэлэригэр сибэкки дьөрбөтө туттарылынна. Сэрии буолбатын, хаан тохтубатын, биһиги ыччаттарбыт сырдык күннээх, ыраас халлааннаах эйэлээх кэмҥэ дьоллоохтук олороллорун туhугар “Эйэ, дьол иhин” ырыа күргүөмүнэн ылланна. «Эйгэ» саҥа көлүөнэ библиотеката бэлэмнээбит «Умнубаппыт, киэн туттабыт!» презентациятын уонна “Время героев: СВО честь и отвага” быыстапкатын көрдүлэр, билистилэр.
Ийэ дойдуларын туһугар эдэркээн олохторун толук уурбут биир дойдулаахтарбыт сырдык ааттара үйэтитиллэ турдун, кинилэр хорсун быһыылара, ийэ дойдуга бэриниилээх буолуулара хаһан да умнуллубатын, кэлэр кэнчээри ыччаттарбытыгар бэриллэ турдун! — диэн 1 Хомустаах «Эйгэ» модельнай библиотеката суруйда.
«Эҥсиэли» хаһыат