«Тыа сирин оскуолата уонна үөрэхтээһин маарката» өрөспүүбүлүкэтээҕи XX педагогическай дьаарбаҥкаҕа Нам улууһун оскуолаларыттан, уһуйааннарыттан, эбии үөрэхтээһин тэрилтэлэриттэн 210 педагог кыттааччы да, эксперт да, ыалдьыт да быһыытынан кытынна.
Дьаарбаҥка Мэҥэ Хаҥалас улууһун Майа сэлиэнньэтин Ураһалаах алааһыгар от ыйын 8-10 күннэригэр ыытылынна. Киэҥ алааһы сырыһыннара тутуллубут ураһаларга ийэ тыл, методическай үлэ, ааҕыы, финансовай грамотность, экология уо.д.а. хайысхаларга түһүлгэлэр, былаһааккалар тэриллэннэр, педагогическай үлэни сырдаттылар, уопут атастастылар, киэҥник кэпсэттилэр.
Үс күннээх үлэ түмүгүнэн, Нам 2-с нүөмэрдээх оскуолатын коллектива, химия учуутала Матрёна Сидорова (Нам 2-с нүөмэрдээх оскуолата) уонна педагог-психолог Татьяна Максимова (Е.П. Сивцев аатынан II Хомустаах оскуолата) үөрэх управлениеларын начальниктарын Граннарын ыллылар. Саха тылын учуутала Пелагея Павлова (И.Е. Винокуров аатынан Хатыҥ Арыы оскуолата) «А.Е. Кулаковскай айар үлэтин чинчийии» үлэтинэн I миэстэни, хамаанданан А.Е. Кулаковскайга аналлаах квест-оонньууга кыайыыны ситистилэр.
Д.Ф. Алексеев аатынан I Хомустаах оскуолата «Лучший штаб воспитательной работы» куонкуруска «За верность традициям» анал ааты, уруһуй, технология учуутала Феодосия Протодьяконова (Е.М. Ларионов аатынан Салбаҥ оскуолата) пленэргэ Добун сурук 2-с үрдэлин, М.Е. Охлопкова аатынан Түбэ орто оскуолата «Формирование экологического воспитания в малокомплектной школе» үлэлэринэн «Лучшие в экологическом образовании» анал ааты ыллылар. «Дидактическай оонньуу» быыстапка-куонкуруһугар «Сардаана» уһуйаан (Бөтүҥ) III истиэпэннээх диплом, «Солнышко» уһуйаан (Нам) «Оригинальная дидактическая игра» номинацияны ыллылар.
Иис-уус түһүлгэтигэр София Васильева (3-с нүөмэрдээх Нам оскуолата) куукула оҥоһукка I истиэпэннээх лауреат, Виктор Стручков (И.С. Гаврильев аатынан 1 нүөмэрдээх Нам оскуолата) маһынан кыһан оҥорууга 3-с истиэпэннээх лауреат буоллулар. «Ийэ тыл – төрөппүт уонна оҕо» түһүлгэҕэ В.П. Артамонов аатынан ХСФЛ «Сахалыы тыллаах эйгэ» үлэнэн, Нам 2-с нүөмэрдээх оскуолата «Ааҕар алаас» үлэнэн «Оҕону сахалыы тыыҥҥа иитэр эйгэни тэрийэр бастыҥ бырайыак» анал ааттары, И.С. Гаврильев аатынан Нам 1 нүөмэрдээх оскуолата А.Н. Анисимов аатынан номинацияҕа дипломант аатын ыллылар. «Солнышко» уһуйаан «Лучший педагогический опыт образовательной организации по реализации программы «Эркээйи эргиирэ: создание среды саморазвития детей и молодежи» үлэлэрэ грамотанан бэлиэтэннэ. Сонорго «Кэскил» уһуйаан (Нам) 1 миэстэни, «Лучший образ» хамаанданан куонкуруска «Солнышко» уһуйаан (Нам) көрөөччүлэр биһирэбиллэрин ыллылар.
«Кырачааннар көрдөөх күннэрэ» бырайыак куонкуруһугар «Чуораанчык» уһуйаан (Нам) «Подготовка к чтению» номинацияны ылла. Үөрэх управлениета уонна И.С. Гаврильев аатынан Нам 1 нүөмэрдээх оскуола холбоһуктаах хамаандалара «Туох? Ханна? Хаһан?» интеллектуальнай оонньууга 1-кы миэстэни ылан өрөгөй үөрүүтүн биллилэр. Саахымат күрэхтэһиитигэр Татьяна Касьянова (Е.М. Ларионов аатынан Салбаҥ оскуолата) 1-кы, Туйаара Жиркова (И.Е. Винокуров аатынан Хатыҥ-Арыы оскуолата) 3-с миэстэни ыллылар. Нам 2-с нүөмэрдээх оскуолата виртуальнай түһүмэххэ 3-с истиэпэннээх дипломант буоллулар.
Атын улуустар үлэлэрин көрөн-истэн, өссө тугу оҥоруохха сөбүн торумнаан, оҕону иитиигэ, үөрэтиигэ туһуламмыт саҥа бырайыагы толкуйдаан эбэтэр кэҥэтэн биэрэр баҕалаах кэллибит. Ол буоллаҕа педагогическай дьаарбаҥка биир сыала.
Татьяна Касьянова