Ахсынньы 12 күнүгэр дойдубутугар Дьиэ кэргэн, СӨ Оҕо саас сылларынан З.П. Винокуров аатынан Намнааҕы оҕо искусствотын оскуолатын уруһуй кылааһын учуутала Яна Христофорова үөрэнээччилэрин Колесова Нарыйа уонна Колосова Айта персональнай быыстапкалара үөрэхтэрин кыһатыгар – И.С. Гаврильев аатынан Нам 1 №-дээх орто оскуолатын актовай саалатыгар көрдөрүүгэ туруорулунна.
Айта уонна Нарыйа 7 “б” кылааска бииргэ үөрэнэллэр. Айта уруһуй кылааһыгар 2021 с. киирбит, билигин 4 кылааска үөрэнэр, оттон Нарыйа 5 кылааска үөрэнэр, быйыл уруһуй кылааһын бүтэрэр.
Быыстапка үөрүүлээх аһыллыытын аалай лиэнтэтин Нарыйа Колесова, Айта Колосова уонна уруһуй, технология учуутала, СӨ үөрэҕириитин туйгуна Ираида Иванова быһа кырыйдылар. Бэлиэ күҥҥэ талааннаах оҕолору оскуола дириэктэрэ Николай Парников, кылаас салайааччыта Валентина Колодезникова, төрөппүт Галима Колесова, эбээ Сардана Колосова истиҥник эҕэрдэлээтилэр, кинилэргэ махтал суруктары, сэмэй бэлэхтэри туттардылар.
Учууталлара Яна Кимовна бу оскуолаттан элбэх оҕо уруһуйга уһуйулларын, уруһуй кылааһа быйыл 50 сыллаах үбүлүөйүн ылбытын бэлиэтээн туран, оҕо искусствотын оскуолатын дириэктэрэ А.С. Афанасьев аатыттан улуустааҕы, өрөспүүбүлүкэтээҕи, Бүтүн Россиятааҕы куонкурустарга ситиһиилээхтик кыттар талааннаах үөрэнээччилэригэр уонна кинилэр төрөппүттэригэр грамоталары, өйдөбүнньүк бэлэхтэри утары уунна.
Дириэктэр Николай Григорьевич оскуолаҕа үөрэнээччилэр бастакы быыстапкалара тэриллибитин эттэ, инникитин үгэскэ кубулуйарыгар баҕарда. Кини оҕолор дьоҕурдарын, талааннарын арыйар, кэрэ эйгэҕэ киллэрэр учууталларга Яна Кимовнаҕа, Ираида Николаевнаҕа махтал суруктары туттарда.
Уруһуй абылаҥар ылларбыт Нарыйа Колесова, Айта Колосова быыстапкаҕа мэтириэт, үөрэх натюрмордун, элбэх фигуралаах композиция, пейзаж о.д.а. жанрга толорбут үлэлэрэ турбуттар. Кыргыттар олохторугар бастакы дьоһун хардыыларын оҥороллор. Уруһуй быыстапкатын бииргэ үөрэнэр оҕолоро, тэрээһин кыттыылаахтара сэргии, сэҥээрэ көрдүлэр.
Касьян Олесов-Олук