Намҥа Ленскэй нэһилиэк олохтоох дьаһалтата ахсынньы 21-22 күннэригэр Петр Оконешников аатыгар уолаттарга волейболга тэрийбит U-21 аһаҕас турнирыгар 8 хамаанда кэлэн күрэхтэстэ.
Ол курдук, Чурапчы, Таатта, Мэҥэ Хаҥалас, “Легион” волейбол кулууба, Уус Майа, АГАТУ, Нам уонна Ньургун Тимофеев аатынан өрөспүүбүлүкэтээҕи Олимпийскай эрэл спорт оскуолата хамаандаларыттан бастыҥ оонньооччуларынан Нам улууһа ааттанна. Иккис АГАТУ уонна Чурапчы хамаандалара кэлэллэр.
Волейбол оонньуутун “Бастыҥ оонньооччу” анал аатынан Нам улууһун эдэр волейболиһа Андриан Григорьев наҕараадаланна. “Лучший защитник” аат Таатта уолугар Олег Малышевка ананар. “Лучший блокирующий” – Чурапчы оонньооччутугар Альберт Корякиҥҥа. “Лучший нападающий” – АГАТУ устудьуонугар Кирилл Алексеевка. “Лучший связующий” – Нам уолугар Кирсан Эверстовка. “Перспективный игрок” – Уус Маайа оонньооччутугар Илья Малишевскайга. “Вечная мерзлота” фондуттан MVP бириис Нам волейболиһыгар Алтан Афанасьевка.
Петр Оконешников 1980-90 сс. Нам орто оскуолатыгар физругунан, 1990-99 сс. Граф Биэрэгэр Затоннааҕы орто оскуолаҕа дириэктэрдиир. 1998 с. Намнааҕы Оҕо спорт оскуолатыгар үлэлээбитэ.
Ленскэй нэһилиэк баһылыга Петр Сокольников тыла бигэргэтэр: спорка бэриниилээх Петр Петровичка оҕо сылдьан үөрэммиттэр үтүө тылынан ахталлара. Дэлэҕэ, 3 кылаас оҕото кылгас кэмҥэ кини үөрэппитин билигин кэлэн өйдүө дуо? Этэллэрин курдук, Петр Оконешников киһи-киһитэ буолара көстөр.
