Хас сыл аайы, оҕолор сайын бэс ыйыттан саҕалаан волонтерскай үлэлэрэ саҕаланар. Сырылас куйааска уулусса устун куул соһуулаах, кумааҕы, пластиковай бытыылка уо.д.а. бөҕү бырахпыттарын оҕолорбут хомуйан нэһилиэкпит көстөр быһыытын ырааһырдаллара хайҕаллаах. Ийэ айылҕаны харыстаан, киртитимэн, диэн от күөҕэ форменнай таҥастарыгар суруктаах оҕолору массыынанан ааһан иһэн көрөр буолуохтааххыт.
— Биһиги бэс ыйыттан хас күн аайы мустан үлэлиибит, күннээҕи былааммытын салайааччыбыт этэр, ону И.С.Гаврильев аатынан 1–кы №-дээх орто оскуола, Намнааҕы 2-c №-дээх орто оскуола уонна улуустааҕы гимназия үөрэнээччилэрэ уопсайа 24 буолан бүгүҥҥү күҥҥэ үлэлии сылдьабыт, — диэн волоентердар хамандыырдара Эдик Кайгородов кэпсээтэ.
Онуоха, И.С.Гаврильев аатынан 1–кы №-дээх орто оскуола лааҕырын директора Михаил Габышев манныгы сырдатта: — лааҕыр оҕолорун күҥҥэ 3-тэ аһатабыт завтрак, обед, полдник. Бэйэбит оскуолабыт оҕолорун таһынан, ДЮСШ уонна ДШИ лааҕыр оҕолоро аһыыллар. Волонтердар бэс ыйын 1-кы күнүттэн 26 күнүгэр дылы сылдьыахтаахтар, иккис сезон үлэлиирэ биллибэт.
Оҕолорбут үлэлэрин сыаналыахха, тула өттүбүтүн киртитимиэххэ, айылҕаны харыстыахха!
Лена Корякина