Нам сэлиэнньэтин “Строительнай” түөлбэ көхтөөх дьоно-сэргэтэ “Встреча соседей” тэрээһиҥҥэ муһунна.
Түөлбэ Нам сэлиэнньэтигэр бастыҥнартан биирдэстэрэ буолар. Бүгүҥҥү тэрээһиҥҥэ аҕам саастаахтар олоххо көхтөөхтөрө өссө төгүл көһүннэ. Киһини толкуйдатар, эти-сиини хамсатар күрэхтэргэ бука бары, ис сүрэхтэриттэн кытыннылар.
Мааны астаах остуол тула олорон түөлбэ көхтөөхтөрө инники күннэргэ туох тэрээһиннэри ыыталларын былаанныыллар. Холобура, “Строительнай” түөлбэҕэ буоларын курдук, маҥнайгы кылааска киирэччилэри чиэстииллэрэ биллэр. Түөлбэттэн сыллата 10 иһинэн оҕо оскуолаҕа киирэр эбит.
Дьон сыанабылынан, түөлбэ салайааччыта Вера Прокопьева уонна депутат Анна Гоголева түөлбэни түмэн, иилээн-саҕалаан, үлэ үөһүгэр олорор, ыалларыгар үгүс тэрээһиннэри ыытан сэргэхситии таһааралларынан биллэллэр. Холобура, Вера Прокопьева дьаарбаҥканы үрдүк таһымҥа баһылаан-көһүлээн ыытар, дьон холобур ылыан ылар. Оттон Анна Гоголева улуус таһымнаах спорт тэрээһиннэригэр көхтөөх Нам олохтооҕо буолар.
«Бүгүҥҥү тэрээһиммитигэр Собакина Людмила Васильевна бастакы «Матрешки» оонньуутугар 1-кы миэстэни Егорова Мария Афанасьевна ылла, 2-с миэстэҕэ Хордогосова Нина Иннокентьевна таҕыста уонна 3-с миэстэ Прокопьева Вера Васильевна буолла.
Людмила Васильевна иккис «Бросок в кольцо» оонньуутугар 1-кы миэстэни Иванова Матрёна Семеновна, 2-с миэстэни Васильева Надежда Ивановна, 3-с миэстэни Эверстова Мария Исаевна ыллылар. Бу оонньууга Егорова М.А. уонна Захарова Е.В. очколара тэң буолан биһирэбил бириис туттулар.
Иванова Матрёна Семеновна салайан ыыппыт кронхолга кыайыыны Егорова Мария Афанасьевна сурунна. Иккис миэстэҕэ Ларионова Е.И. таҕыста. Үһүс миэстэ Филиппова Лидия Ивановна буолла.
Гоголева Анна Петровна ыыппыт дартс оонньууга бастыҥ дротигы быраҕааччы Филиппова Лидия Ивановна, иккис Ларионова Е.А. уонна үһүс Романова Анисия Романовна буоллулар», — диэн кэпсиир түөлбэ салайааччыта Вера Васильевна.
Харысхан Попов