Үөдэйгэ үөрүүлээх түгэн тосхойдо. Ол курдук бүгүн, ахсынньы 27 күнүгэр, Е.И. Кондакова аатынан олохтоох балыыһаҕа аптека пууна үөрүүлээх быһыыга аһылынна. Аптека пууна Намнааҕы киин балыыһа иһинэн, кылаабынай быраас Ариан Сергеев өйөбүлүнэн, аһылынна.
Кыһыл лиэнтэни олохтоох дьаһалта баһылыга Иван Гаврильев, киин балыыһа кылаабынай бырааһа Ариан Сергеев уонна улуустааҕы аптека провизора Людмила Жиркова үөрүүлээх быһыыга-майгыга кырыйдылар. Аптекаҕа ис-үөс, тымныйыы, сүрэх, тымыр онтон да атын бастакы суһал көмө эмэ-томо барыта баар. Анал хоско холодильникка, сөптөөх ыскаапка хараллан тураллар. Бастакы атыылаһааччы Мария Поповаҕа нэһилиэк баһылыга Иван Гаврильев сэмэй бэлэҕи уонна Ариан Николаевичка махтал суругу туттарда.
Аптека үлэлиир бириэмэтэ: бэнидиэнньик-бээтинсэ күннэргэ сарсыарда 9-тан киэһэ 16 ч. диэри, 13-14 чч. — эбиэт кэмэ. Атыылааччынан олохтоох эмтиир амбулатория үлэһитэ Галина Скрябина үлэлиир диэн Ариан Николаевич билиһиннэрэн туран, ситиһиилэри уонна сэмэй бэлэҕи туттарда. Барыбытын долгутар терапевт быраас штата баарын иһитиннэрдэ. Үөрэхтээх анал быраас кэлэригэр эрэл кыыма баар.
Екатерина Эверстова, Үөдэй