Үөдэйгэ Нам улууһун тимир уустарын ассоциацията ыалдьыттаан ааста. Көрсүһүүгэ тимири уһаарыынан интэриэһиргиир, дьарыктаныан баҕалаах дьон муһуннулар.
Кэпсэтиигэ сүнньүнэн тимири уһаарыы умнууга хаалбакка хас нэһилиэк аайы сөргүтүллэн олоххо киирэригэр санаалаах ыытылынна. Хас биирдии нэһилиэккэ уус дьиэлэрэ, түмсүүлэр тэриллэн үлэлииллэригэр уонна маны тэрийэн үлэлэтэр дьону үөрэтиигэ, сүбэ-ама биэрэргэ үлэлэһэллэрин биллэрдилэр. Хайдах бэйэ биисинэһин тэриниэххэ сөбүн, ону сайыннаран, кэҥэтэн маһынан уһанан, тимири уһааран, туойунан дьарыктанан араас оҥоһуктары оҥорон төрүт оҥорон таһаарар бородууксуйаны киэҥ эйгэҕэ таһаарарга туһалаах иһитиннэриилэри оҥордулар. Коммерческайа суох тэрилтэлэр (НКО), түөлбэлэринэн уопсастыбаннай бэйэни салайыныы түмсүүлэрэ (ТОС, түөлбэ), урбаанньыттар эбэтэр биирдиилээн дьон бырайыактары суруйан бу үөһэ этиллибит хайысхаларынан грант күрэхтэригэр эбэтэр социальнай контракт нөҥүө көмө ылан олоххо киллэриигэ бигэтик сананан кыттыахтарын сөп диэн бэрт судургутук кэпсээтилэр.
Кэпсэтии түмүгүнэн сэтинньигэ тимири уһаарыан баҕалаах дьону Нам түмсүү маастардарыгар үөрэтэргэ уонна кэлэр сылга Үөдэй нэһилиэгэр тимири уһаарыы күнүн тэрийэргэ диэн биир бигэ санааҕа кэллибит. Санатан эттэххэ, Үөдэйбит нэһилиэгин үбүлүөйдээх ыһыаҕар тимири уһаарыы Нам Үөдэйиттэн саҕаламмыт буолуохтаах диэн сабаҕалааһынтан, Нам улууһун тимири уһаарыы маастардара Үөдэй тааһыттан ылан былыргылыы тимири уһаарыы, охсон оҥоруу ньыматын көрдөрөн, кэпсээн барбыттара. Чулуу маастардар Үөдэй сириттэн таас ылан былыргылыы ньыманан охсон батыйа, быһах онтон да атын көрүҥнэри оҥорон киэҥ эйгэҕэ таһаараллар, сүдү күрэхтэргэ бастыҥ миэстэлэри ылаллар. Үөдэйбит сиригэр-уотугар “Тимир умаппыт” диэн ааттаах-суоллаах икки сир баар, онон туох да мээнэҕэ буолбат, айылҕабытыгар баар ис кыахпытын, күүспүтүн арыйан биир, икки киһиттэн саҕаланан бардаҕына туох эрэ дьикти арыллан тахсар кыаҕа баар дии саныыбыт.
Билигин кэмэ кэллэ диэтэхпитинэ алҕаһаабаппыт, тоҕо диэтэр Сахабыт сиригэр маастардар баалларыттан уонна ыччат дьон ылсыһан үөрэнэн эрэллэриттэн үөрэбит, онтон уопут ылан, үөрэнэн биһиги нэһилиэкпитигэр төрүт өбүгэ дьарыгын сөргүтэн үйэлээх үлэнэн дьарыктанар дьон баар буолалларыгар баҕарабыт.
Көрсүһүү алтынньы 19 күнүгэр З.П. Саввин аатынан Үөдэй орто оскуолатын иһинэн үлэлиир “Ийэҕэ албан аат” түмэл дьиэтигэр ыытылынна. Бу күн тимир уустарын түмсүү бэрэссэдээтэлэ, СӨ норуотун маастара Михаил Баишев, Нам улууһун “Мин бизнеһым киин” салайааччыта Марфа Тарабукина, тимир уустара (стипендиаттар) Прокопий Ильин, Александр Михайлов, “Үөдэй нэһилиэгэ” муниципальнай тэриллии баһылыгын эбээһинэһин эппиэттээх толорооччута Николай Обутов кыттыыны ыллылар.
Екатерина ЭВЕРСТОВА