Бүгүн «Нам улууһа» МТ 2023 сыллааҕы үлэтин отчуоттуур улуус баһылыгын э.т. Анатолий Павлов салайааччылаах 1-кы бөлөх Үөдэй нэһилиэгин дьонугар-сэргэтигэр сырытта. Итиэннэ улуус депутаттарын сэбиэтин ааспыт сыллааҕы үлэтин председатель Алексей Винокуров отчуоттаата.
Ыйытыыга, туруорсууга, этиигэ киириэх иннинэ Анатолий Иванович ааспыт сыллааҕы боротокуолга киирбит туруорсуулар төһөтө туолбутун, туолбатаҕын иһитиннэрдэ. Ол курдук, Үөдэй-Хомустаах суолун икки ардынааҕы суол туорааһыннарыгар талахтары кэрдии үлэтин сороҕо ыытыллыбыт, бу сылга эмиэ салгыы ыытылларын иһитиннэрдэ.
Петр Федотов сайылыкка дьиэ туттубутугар уот ситимэ тардыллыытыгар харгыстары көрсүбүтүн эттэ. Нэһилиэккэ иккис сылын кыһалҕа буолбут олохтоох амбулаторияҕа быраас боппуруоһун ыйытта.
Оскуолаҕа музей тэриллиитин ирдээн баран тоҕо толору штаты көрбөттөрүн, оскуола капитальнай өрөмүөнүн программатыгар киллэриини ыйыттылар. Оскуола автобуһугар анал идэлээх суоппар көстөрө уустугун эттилэр.
Кэтэх хаһаайыстыбалаах дьон от үлэтигэр, тиэйиитигэр ыарахаттары көрсөллөрүн эппиттэригэр нэһилиэк баһылыга болҕомто ууруохпут диэн эрэннэрдэ. Кооперативка ыанньыксыт уонна бостуук хамнаһа кыра буолан үлэһит көстөрө ыарахан эбит. Ол эрэн, тэрээһиннээх хаһаайыстыбалар төлөбүрдэрэ үрдүк буолан кыһалҕа суох. Сайылыкка дьиэ туттуутугар программаны туоһулаһан сөптөөх эппиэти ыллылар.
Лесная уулуссаҕа гаас утаҕа хаһан тардылларын ыйыттылар, гаас киирбэккэ дьиэ наймылаһан олороллорун этиннилэр.
Толору хааччыллыылаах дьиэттэн убаҕас тобоҕу оботторуу улахан кыһалҕа буолбут. Урбаанньыты сакаастыыр буоллахтарына баһырхай сыана буоларын этэн туран, «НКТЭ» АО дуу, управляющай хампаанньа дуу техниката үргүлдьү оботторон баралларын курдук туруорустулар.
Уот остуолбалара сууллаары турарын биллэрдэххэ түргэнник болҕомто ууралларыгар, амбулатория тымныытын эттилэр. Толору хааччыллыыны үлэлэтэри туруорустулар. Онуоха кылаабынай быраас эһиил капитальнай өрөмүөн ыытылларын иһитиннэрдэ.
Халаан кэмигэр Арҕаа сайылыкка уот ситимэ бириэмэтигэр холбоноро буоллар көһөн тахсыы көхтөөх буолуо этэ диэн эттилэр.
Бу уустук кэмҥэ көрү-нары батыспакка үлэҕэ-хамнаска, тыа хаһаайыстыбатын сайдыытыгар улахан болҕомто, сыал-сорук туруорунан үлэлиэххэ наадатын, улуус депутатын быыбарын уһаппакка ыытары, тыа хаһаайыстыбатын сайыннарыыга депутаттар күүскэ үлэлэһэллэригэр, тыйыс тымныыларга уоту араарары букатын тохтотууну, тыа сиригэр доруобуйа харыстабылын тупсарыыга улуус дьаһалтатын кытары бииргэ үлэлэһэн ураты болҕомто ууралларыгар, кыайыынан-хотуунан эрэ муҥурдаммакка баар итэҕэстэри туоратарга үлэлэһиҥ, тыа хаһаайыстыбатынан дьарыктанар улуус буоларбыт быһыытынан, бэйэ оҥорон таһаарар бородууксуйабыт остуолга хото баар буолуохтаах, ону сайыннарар сыаллаах көдьүүстээхтик үлэлииргитигэр, ситиһэргитигэр баҕарабын, — диэн Александр Ядреев тус санаатын тириэртэ.
Оскуолаҕа үлэлии кэлбит учууталлар олорор дьиэлэрэ тымныытынан өрөмүөннүүргэ туруорустулар. Саас силлиэ, тыал кэмигэр суол астарыытыгар үбү кырыымчыктаабакка көрөллөрүгэр, үүт туттарыытыгар атыылаһыллар төлөбүрүн үрдэтэллэрэ буоллар, ыччакка көдьүүстэрэ үрдүө этэ диэн санааларын эттилэр.
Саастаах дьон көҕүрүүр да, соччонон ынах-сүөһү ахсаана аччыыр. Онон ыччаты тыа хаһаайыстыбатыгар сыһыарар үлэни күүскэ ыытыахха диэн Петр Федотов өссө төгүл тоһоҕолоон эттэ.
Бу ыйытыылары сэргэ, уот ситимин СИП боруобакка уларытыыга, трансформатордары саҥардыыга үгүс ыйытыы киирдэ. РЭС үлэтин көдьүүстээҕин бэлиэтээтилэр.
Отчуокка кэлбит Үөдэй олохтоохторо улууспутугар үгүс араас хайысхалаах үлэлэр ыытыллалларын этэн туран, «Нам улууһа» МТ дьаһалтатын ааспыт 2023 сыллааҕы үлэтин биһирииллэрин биллэрдилэр.
Семен Аргунов