Чугдаар, чугдаар, чуораан,
Аһылынна киэҥ аан!
Саҥа 2023-2024 үөрэх дьылын Е.М. Шапошников аатынан Хамаҕатта орто оскуолата 280-ча үөрэнээччилээх көрүстэ. Маҥнайгы кылааска 17 дьиэ кэргэн оҕото киирдэ. Учууталынан Александра Скрябина ананна. Үөрүүлээх түгэн Российскай Федерация уонна Саха Республикатын Өрөгөй ырыаларынан саҕаланна. Оскуола салайааччыта Анатолий Дьяконов ыалдьыттары, оҕолору, төрөппүттэри эҕэрдэлээн туран, 17 маҥнайгы кылаас үөрэнээччитин аатын дорҕоонноохтук билиһиннэрдэ. Үөрэҕирии салаатыгар туох саҥа уларыйыылар киирбиттэрин, ааспыт үөрэх сылыгар оскуоланы бүтэрээччилэр ситиһиилэрин иһитиннэрдэ. Ол курдук, оскуоланы бүтэрбит ыччаттарбыт бары 100% үөрэххэ киирдилэр, олортон алтата – үрдүк үөрэххэ (Герцен аат. РГБУ, М.К. Аммосов аат. ХИФУ, АГИКИ).
Дьон болҕомтотун тардыан сөптөөх сонунунан буолар биһиги оскуолабыт бибилэтиэкэтэ Россия бастакы бэрэсэдьиэнэ Б. Ельцин аат. бибилэтиэкэ фондатын матырыйаалларын ыраахтан туһанар кыахтанныбыт (Центр удаленного доступа). Маннык бибилэтиэкэлэр республикабыт үрдүнэн 50 ахсааннаах буолуохтаах (ол иһигэр 25 оскуола бибилэтиэкэтэ).
Оскуолабытыгар биэс саҥа учуутал үлэлии кэллэ: Рустам Дмитриев – уруһуй, Наталья Протопопова, Яна Иванова – омук тылын, Айыына Иванова – химия учууталларынан, Софья Стрекаловская – социальнай педагогунан.
Улуус дьаһалтатыттан Петр Абрамов, үөрэх управлениетыттан Анисия Ипполитова, нэһилиэк дьаһалтатыттан Владлен Москвитин, оскуолабыт бэтэрээн бибилэтиэкэрэ Розалия Дунаева эҕэрдэ тыллары эттилэр, үүммүт үөрэх дьылыгар үрдүк ситиһиилэри баҕардылар.
Саҥа үөрэх дьылыгар бастакы чуорааны тыаһатар үрдүк чиэс 1 кылаас үөрэнээччитигэр Кира Колесоваҕа уонна 11 кылаас үөрэнээччитигэр Айтал Кельциевкэ тигистэ.
Үүммүт 2023-2024 үөрэх дьыла барыбытыгар ситиһиилэри аҕаллын!
Василиса Ильина, Е.М. Шапошников аатынан Хамаҕатта орто оскуолатын үөрэнээччитэ