Бүгүн, олунньу 6 күнүгэр, Нам улууһун үөрэҕин үлэһиттэрин, төрөппүт уопсастыбаннаһа кыттыылаах олунньутааҕы пленарнай мунньах Хатыҥ Арыы нэһилиэгин Аппаанытыгар «Чороон» НАК ыытыллар. Быйылгы мунньах «Нам улууһугар биир кэлим үөрэх ситимин сайыннарыы» диэн темалаах.
РФ Дьиэ кэргэн, Саха сиригэр Оҕо саас, Нам улууһугар Оҕо спордун сылларынан оҕону араас өттүнэн сайыннарар сыаллаах Нам улууһун үөрэҕин биир ситимин тупсарыы, үөрэнээччилэр интэриэстэригэр, дьоҕурдарыгар, ситиһиилэригэр олоҕуран үлэни өссө дириҥник ыытыы тула, итиэннэ үөрэх, наука эйгэтигэр баар кыһалҕалары кэпсэтиэхтэрэ.
Олунньутааҕы пленарнай мунньахха Намнааҕы үөрэх управлениетын салайааччыта Мария Игнатьева үөрэх салаатын сүрүн үлэтин, инники былааннарын, ону таһынан эрдэ ылыллыбыт программалары билиһиннэрдэ. Үөрэх, иитии, дьоҕуру сайыннарыы, дойдуга бэриниилээх буолуу, спорт үлэтигэр о.д.а. бары хайысхаҕа, тосхоллорго, саҥа уларыйыыларга тохтоон ылла. «Нам улууһа» МТ баһылыгын солбуйааччы Филипп Николаев ааспыт 2023 сыл ситиһиилэрин, үөрэх эйгэтигэр саҥа тутуу үлэтин ыытыыны иһитиннэрдэ. Улуус депутаттарын сэбиэтин председателэ Алексей Винокуров сокуоннас өттүгэр, культуура уонна духуобунай сайдыы управлениетын салайааччыта Семен Ядрихинскай үөрэнээччилэр культура тэрээһиннэригэр кыттыыларын, Пушкин каартатынан сынньалаҥ кииннэргэ, норуот айымньытын дьиэлэригэр, библиотекаларга, оҕо искусствотын оскуолатыгар, филиалларга төһө сылдьалларын кэпсээтилэр.
З.П. Саввин аатынан Үөдэй орто оскуолата Бүтүн Россиятааҕы «Бастакылар хамсааһыннара» оҕо хамсааһына бырайыак үлэтиттэн директор Вероника Барашкова уопуттарын, итиэннэ Нам улууһун оскуолаларыгар бырайыагы тэрийии специалиһа Сахаяна Васильева хайдах үлэлэтэ сылдьалларын иһиттибит. Улууска Оҕо спордун сылынан Намнааҕы 2-с нүөмэрдээх оскуола физкультураҕа учуутала Александр Колосов спортивнай кулууп ситиһиитин, үлэтин туһунан уопут быһыытынан дакылааттаата. Намнааҕы «Кыталык» оҕо сайдар киинигэр оҕону кыра сааһыттан оруолунан оонньотон идэни билэ, сатыыр буола улааталларыгар иитии туһунан уопуттарын үллэһиннилэр. Намнааҕы техникум профессиональнай идэлэрин, үлэтин, үөрэтэр программатын туһунан сырдаттылар.
«Нам улууһа» МТ үөрэҕин управлениета, И.Е. Винокуров аатынан Намнааҕы педагогическай колледж уонна Намнааҕы техникум бииргэ үлэлэһиигэ үс өрүттээх сөбүлэһии түһэристилэр.
Олунньутааҕы мунньах чэрчитинэн үгүс сыралаах, үтүө суобастаах үлэлэринэн үгүс салайааччы, учуутал, педагог, иитээччи, үөрэх систиэмэтин ветераннара государственнай, өрөспүүбүлүкэтээҕи, муниципальнай, идэлээх сойуустан наҕараадалары туттулар.
Мунньах чэрчитинэн, иитии тематыгар семинардар, сессиялар ыытыллыахтара, уопут атастаһыахтара, итиэннэ инники соруктары торумнуохтара. З.И. Тихонова аатынан «Түөлбэ» оҕо киинигэр тэриллибит норуот үөрэҕириитин музейыгар сылдьыахтара.
Семен Аргунов