Нам улууһун быйылгы ыһыаҕын, буоларын курдук, олус сөбүлээбиттэрин, сэҥээрбитин биллэрдилэр. Түһүлгэ ыалдьыттарын киирии ааҥҥа үгэскэ кубулуйбут сиэр быһыытынан Далбар Хотуттар алаадьынан айах тутан көрсүбүттэрэ.
Нам улууһун олохтоохторо кыһамньылаахтык ыраастаммыт, сөргүтүллэн оҥоһуллубут Аал Луук Мастаах Ыһыахтыыр пааркабытыгар олус үөрэн-көтөн сынньанна. Ол курдук, киирии ааҥҥа Нам сэлиэнньэтин түөлбэлэрин салайааччылара тута алаадьылаат алгыс иҥэринэ, оһуохайдаан күүс ыла кэлээччилэргэ алаадьынан айах туттулар. Ону тэҥэ, улуустааҕы тыа хаһаайыстыбатын үлэһиттэрэ сарсыарда эрдэттэн бэрт кыһамньылаахтык ис миинин олгуйга өрөөт, кэлээччи дьону күндүлээбиттэрэ. Бу буоллаҕа, норуот үөрүүтэ-көтүүтэ! Бу буоллаҕа, үлэһит дьон Ыһыаҕа! Сиэрдээх этиигэ олоҕуран сөпсөһөн: “Улууспут ыһыаҕа олус да бэркэ ааста!” — диэн хайҕааччы дьон элбэҕэ хайа киһини үөрдүбэт буолуоҕай?!
Кэнники сылларга Саха итэҕэлэ кэҥээтэр-кэҥээн, алгыс тыллары иҥэринэ кэлээччи элбиир. Бэс ыйын 16 күнүгэр Алексей Пинигин-Лоҥхо Өлөксөй, Владимир Сыромятников-Дьиэрэй, Геннадий Игнатьев-Айыы Уола турукка киирэн тэҥинэн аал уот иччитэ Хатан Тэмиэрийэ аатын ааттаан көрдөспүттэрэ, тыл эппиттэрэ.
Ленскэй нэһилиэк олохтоох дьаһалтата түһүлгүлээн олорон үлэһит дьонун эҕэрдэлээбитэ. Баһылык Петр Сокольников түөлбэлэрин салайааччыларыгар махтанан туран сэмэй бэлэхтэри, наҕараадалары туттартаабыта. Түөлбэ салайааччылара: “Хайа да баһылыкка маннык болҕомто ылбатахпыт, кыһамньы көрбөтөхпүт”, — диэн аһаҕастык эппиттэриттэн бэл, бэйэм уйадыйан ылбытым. Бэлиэтээн эттэххэ, суолталаах бэлиэ күннэргэ Нам сэлиэнньэтин түөлбэлэрин салайааччылара баһылыкка кэлэн үөрүүлээх быһыыга-майгыга сүбэ мунньах, кэпсэтии тэрийээччилэр.
Нам улууһун ыһыаҕар Ленскэй нэһилиэк олохтоох дьаһалтата биир кэрэхсэнэр күрэхтэһиини бэчимэ тардыһыытын тэрийдэ. Ол курдук, сэлиэнньэҕэ Оҕо уонна Ыччат сыла биллэриллибитинэн, өссө да киэҥ араҥаҕа тахса илик көрүҥү оҕолорго бэчимэ тардыһыытын оҥорбута кэрэхсэбиллээх буолла, ыһыаҕы киэргэттэ. Баһылык бирииһигэр 100 тыһ. солк. суумалаах сертификат иһин аҕыс хамаанда күөн көрсүбүтэ. Даҕатан эттэххэ, улуус хоту нэһилиэктэрэ туруммуттара үөрдэр. Тыҥааһыннаах киирсии түмүгүнэн, баһылыктара Иван Гаврильев ыалдьааччылаах Үөдэй оскуолатын оҕолоро кыайыы өрөгөйүн билбиттэрэ.
Бу күн туруу үлэһиттэр бука бары ыһыах маанылаах аһыттан үтэһэлээх эт, быырпах туппуттара. Маны этэн эрдэхтэрэ, үлэһит үтүө салайааччыга, баһылыкка түбэспит дьоло диэн. Этэллэрин курдук, саха сиэринэн ыһыахтыы кэлбит хайаатар да үтэһэлээх эттээх барыахтаах дииллэр.
Харысхан Попов