Нам улууһугар спорт хайысхата салгыы тупсарыгар нэһилиэктэр үлэни өссө ордук күүһүрдүөхтэрэ. Ол курдук, 2025 сылга улуустааҕы спорт управлениета нэһилиэктэргэ “Спорт – здоровый наслег”, “Наслег тренируется” бырайыактары үлэлэтиэҕэ.
“Үүммүт 2025 сылга нэһилиэктэр спорка сатабыллара сайдарыгар уонна тахсарыгар дириҥ ис хоһоонноох уонна улахан хабааннаах “Наслег тренируется”, “Спорт – здоровый наслег” бырайыактар үлэлиэхтэрэ. 2025 сылга эмиэ интэриэһинэй сыл күүтэр”, – диир улуустааҕы спорт управлениетын салайааччыта Павел Иванов.
РФ Президенэ Владимир Путин этиитинэн, СӨ Ил Дархана Айсен Николаев дьаһалынан 2030 сылга диэри нэһилиэнньэ спордунан дьарыктанарын 70 % ситиһии сыала-соруга турара этиллэр. Билиҥҥитэ Нам улууһугар спордунан дьарыктанааччы – 51 % тэҥнэһэр.
Нэһилиэк спортинструктордара, спортивнай функционердар үлэлэрэ айымньылаах буоларыгар элбэх күрэхтэһиини тэрийэллэрэ ирдэниэҕэ диэн спорт управление иһитиннэрэр. Спорт уонна доруобуйа харыстабылын үлэһиттэрэ хаһааҥҥытааҕар да бииргэ үлэлэһэллэрэ күүтүллэр. Ол курдук, “Спорт – здоровый наслег” бырайыак иһинэн, аҕам саастаах дьарыктаныан иннинэ уонна эрчиллии кэнниттэн бырааска доруобуйатын туругун көрдөрүөҕэ. Дьон доруобуйатын тупсарыыга кэрэхсэбиллээх хамсааһын тахсаары турар.
Оччотугар, дьоннор күрэхтэһиигэ эрэ диэн эрчиллэргэ сыалламмакка, доруобуйаларын, бэйэлэрин тупсаралларыгар спорт дьиэлэригэр хото кэлиэхтэрэ. Ону тэҥэ, маассабай спорт өрө тахсарыгар нэһилиэктэр түөлбэлэрин, тэрилтэрин икки ардыларыгар күрэхтэһиилэр буолуохтаахтара торумнанар. Саалаларга кэлээччилэр сөптөөхтүк дьарыктаналларын спортинструктордар ситиһиэхтэрэ.
Былааннаммыт толкуй олоххо киириэҕэ диэн бигэ санаа баар. Тоҕо? Спорт управлениета хас көрүҥ аайы үс түһүмэхтээх күрэхтэһиилэри тэрийэн 2024 сылга улахан хамсааһын таһаарбыта. Маҥнай дьоҥҥо-сэргэҕэ, салалтаҕа бу тула соһуйуу, утарылаһыы баарын омнуолаабаккын. Онон, Нам улууһугар ааспыт сыл туспа суоллаах-иистээх буолан ааспытын салайааччы Павел Иванов этэр.
“Үс түһүмэхтээх күрэхтэһии элбэх спортсмены хапта. Мантан сиэттэрэн, дьон дьарыгын тохтотон кэбиспэккэ бигэтик эрчиллэр, дьарыктанар буолла.
Улууспутугар Оҕо спордун киинэ арыллыбытынан, ситимнээх үлэ ыытыллара күүһүрүөҕэ: быйылгы сылга спорт управлениета оҕо спордун кытта ыкса ситимнээхтик үлэлэһиэҕэ. Маннык хамсааһын эмиэ хайа да улууска баара иһиллибэт, биллибэт.
Оттон нэһилиэктэр икки ардыларыгар ыытыллар комплекснай спартакиада көрүҥнэрэ 2025 сылга олоччу киириэхтэрэ: Александр Игнатьев, Альберт Ильин ааттарынан спартакиадаларга уонна сайыҥҥы спартакиадаҕа”, – диир Павел Гаврильевич.
Харысхан Попов