“Олимпик” спорт оскуолатын тренерэ Дмитрий Черноградскай иитиллээччитэ, “Азия оҕолоро” VIII-с оонньуу кикбоксиҥҥа кыайыылааҕа Ярослав Габышев СӨ Ил Дархана от ыйын 10 күнүгэр оонньуу кыайыылаахтарын уонна призердарын кытта көрсүһүүтүгэр тыл эттэ.
Ярослав Габышев, “Азия оҕолорун” кикбоксиҥҥа кыайыылааҕа:
«Өрөспүүбүлүкэбит салалтатыгар, тренердэргэ спорка ыра санаабыт туоларыгар кыаҕы биэрбиккитигэр, күнтэн күн маастарыстыбабыт үрдүүрүгэр, эт-хаан өттүнэн уонна профессионально сайдарбытыгар көмөҕүт, “Азия оҕолоро” VIII-с оонньуутун кыттааччыларыттан хаһан эрэ олимпийскай оонньуу сулустара саҕылларыгар итэҕэлгит иһин бары эдэр спортсменнар ааттарыттан улахан махталбын тиэрдэбин”.
Бу көрсүһүүгэ Саха сирин сүүмэрдэммит хамаандатын кыайыылаахтарыгар уонна призердарыгар, тренердэргэ үрдүк көрдөрүүлэрин иһин харчы сертификаттара туттарылынна.
Айсен Николаев, СӨ Ил Дархана:
«Күрэхтэһии 11 күнэ спорт бырааһынньыгынан буолла. “Азия оҕолоро” оонньуу үрдүк таһымҥа ыытылынна. Маныаха бу күннэр сүрүн дьоруойдарынан Россия регионнарыттан, бүтүн азия континеныттан кэлбит эдэр спортсменнар буоллулар. Үгүс элбэх хамаанда бэрэстэбиитэллэрэ оонньуу кыайыылаахтара буолбуттарынан дьоллоннум уонна киэн тутуннум. Тыҥааһыннаах, интэриэһинэй киирсиилэр буоллулар, ону биһиги Дьокуускайбытыттан быһа эфиринэн аан дойду көрдө. Саамай кылаабынайа — бу оҕолор, регионнар, дойдулар икки ардыларыгар доҕордоһуу бырааһынньыга буолла. Бу туһунан Биһиги Бастакы президеммит Михаил Ефимович Николаев өссө 1996 сыллаахха оонньуулары төрүттүүрүгэр этэн турар. “Азия оҕолоро” оонньуубут чиэһинэй, аһаҕас буолуу бэлиэтэ буоларын бары бэлиэтээбиттэрэ олус сыаналанар. Биһиги бастакы нүөмэрдээх сүүмэрдэммит хамаандабыт улахан спортивнай державалар: Узбекистаны, Казахстаны, Беларусь республикатын, Сибирь, Урал, Дальневосточнай федеральнай уокуруктары кытта күрэстэһэн, төрдүс миэстэҕэ тахсыыта, элбэҕи этэр, үрдүктүк сыаналанар. Мин, эһигини, оҕолору, өрөспүүбүлүкэҕит чиэһин саамай үрдүк таһымҥа көмүскээбиккит иһин барыгытын истиҥник эҕэрдэлиибин. Барыгытыгар улахан махтал!”.
Бэлиэтээн эттэххэ, икки сыллааҕыта Владивостокка ыытыллыбыт “Азия оҕолоро” VII-с оонньууга өрөспүүбүлүкэбит хамаандата 37 мэтээллээх (12 кыһыл) алтыс миэстэҕэ тахсыбыта. Оттон быйылгы оонньууларга эдэр спортсменнарбыт 111, ол иһигэр 29 кыһыл, 36 үрүҥ, 46 боруонса мэтээли ситистилэр. Бу туһунан СӨ Ил Дарханын уонна правительствотын пресс-сулууспата иһитиннэрдэ.
Лена Ноговицына