Бүгүн Н.М. Рыкунов аатынан улуустааҕы киин модельнай библиотекаҕа «Үтүө киһи аата умнуллубат» ахтыы киэһэтэ 2 Хомустаахтан төрүттээх, Аҕа дойду Улуу сэриитин кыттыылааҕа, ССРС культуратын туйгуна, Саха АССР культуратын үтүөлээх үлэһитэ, Нам оройуонун Бочуоттаах киһитэ, салайар үлэҕэ эриллибит Афанасий Андреевич Протопопов төрөөбүтэ 100 сылыгар ананна.
Уоттаах сэриигэ кыттыбыт, фашисткай Германияны үлтүрүтүспүт, Кыайыыны уһансыбыт буойун дойдутугар эргиллэн кэлэн, эйэлээх олоҕу тутуспутунан барбыта. Ол курдук, Афанасий Андреевич төрөөбүт нэһилиэгэр ааҕар балаҕан сэбиэдиссэйинэн ананан, дьонун-сэргэтин сырдыкка сирдээбитэ. Кини ити кэмтэн ыла культурнай-маассабай үлэҕэ сыстан, сэмэй кылаатын киллэрсэн, оройуоннааҕы культура отделын сэбиэдиссэйигэр тиийэ үүммүтэ. Олоҕун устатыгар араас салайар дуоһунастарга үтүө суобастаахтык, эппиэтинэстээхтик үлэлээбитэ.
Судургу, сытыары-сымнаҕас майгылаах, көнө сүрүннээх А.А. Протопопов үтүө аатын ахтан, айымньылаах үлэтин сырдатан, иһирэх ахтыылары оҥордулар, эҕэрдэлэрин тиэртилэр, сэмэй бэлэхтэрин туттардылар: Семен Ядрихинскай, Нам улууһун культураҕа, духуобунай сайдыыга управлениетын салайааччыта, Софья Кобякова, улуустааҕы бэтэрээннэр сэбиэттэрин председателэ, Мария Габышева, ССРС культуратын туйгуна, СӨ норуотун хаһаайыстыбатын үтүөлээх үлэһитэ, Нам улууһун, Ленскэй, 2 Хомустаах нэһилиэктэрин Ытык киһитэ, Сергей Никонов, 2 Хомустаах нэһилиэгин баһылыгын солбуйааччы, Иван Бубякин, ССРС культуратын туйгуна, СӨ культуратын үтүөлээх үлэһитэ, Нам улууһун Ытык киһитэ, Дьокуускай куораттан кэлбит ыҥырыылаах ыалдьыттар, аймахтара — Мария Татаринова, Розалия Бочкарева, П.Н. уонна Н.Е. Самсоновтар ааттарынан Хатас орто оскуолатын дириэктэрэ Николай Слепцов уо.д.а.
2 Хомустаах «Сэргэлээх» КК үлэһиттэрэ олохтоох ааптар Лидия Пестрякова-Үүнэр кыыһа Намыйа хоһооннорунан композицияны толорон, сцена бэтэрээннэрэ Иннокентий Иванов, Матрена Оконешникова ырыа ыллаан тэрээһини киэргэттилэр.
Манна Афанасий Андреевич оҕолоро, сиэннэрэ, хос сиэннэрэ, аймахтара, биир дойдулаахтара, бииргэ үлэлээн ааспыт кэллиэгэлэрэ, улуус общественноһа кытынна. Түмүгэр оҕолорун ааттарыттан Елизавета Протопопова мустубуттарга махтанна, тэрийээччилэргэ – 2 Хомустаах дьаһалтатыгар, «Сэргэлээх» КК, улуустааҕы культура управлениетыгар, Н.М. Рыкунов аатынан улуустаҕы киин модельнай бибилиотекаҕа өйдөбүнньүк сувенирдары туттарда. Истиҥ, иһирэх ахтыы киэһэтэ буолла.
Касьян Олесов-Олук