«Лоскутные орнаменты народов Якутии» диэн ааттаах республикатааҕы иистэнньэҥнэр күрэхтэрэ Нам улууһун I Хомустаах нэһилиэгэр аан бастаан тэрилиннэ. Бырайыак ааптардара «Алгыс» НАК уонна куораттан «Прогресс» АНО 2-3 киһилээх иистэнньэҥнэр хамаандаларыгар тута көҥүл темаҕа таҥас кырадаһаныттан араас техниканы туһанан 297х420мм кээмэйдээх панно тигэргэ сорудах биэрбиттэр.
Иистэнньэҥнэр биэс чаас устата толкуйдаан, быһан-отон, тигэн, оҥоһуктарын бүтэрэн дьүүллүүр сүбэҕэ көрдөрөн көмүскээбиттэр. Ол түмүгэр Хамаҕатта нэһилиэгин «Кэрэ» хамаандата «Дьыл Оҕуһа» үлэтинэн кыайыылаах аатын ылбыт. Хамаандаҕа саха-француз лицейтэн Алена Аммосова, Саргылана Данилова, орто оскуолаттан Маргарита Мухина кыттыбыттар. Кинилэр оҥоһуктарыгар матырыйаал 22 арааһын, 7 араас техниканы туттубуттар, үлэлэрин хаачыстыбата, идеята үрдүктүк сыаналаммыт, онон кыайыылааҕынан тахсан электрическэй бүүрүктүүр массыына бириис туппуттар.
I Хомустаах «Иис — Куо» иистэнньэҥнэрэ иккис миэстэ буолбуттар. Бу сонун куонкуруска барыта аҕыс хамаанда массыынанан иистэнэр сатабылын көрдөрбүт.
Куонкурус туһунан Маргарита Мухина:
Сэтинньи 4 күнүгэр күрэххэ кытынныбыт. Хамаандалар иккилии, үстүү иистэнньэҥнээхтэр. Биһиэхэ үлэбит бырайыагын оҥорсорго уонна матырыйаалынан Мария Находкинакөмөлөстө.5 чаас утумнаах үлэ түмүгүнэн «Дьыл Оҕуһа» паннобут 1 миэстэни ылла.Бу күрэххэ «Швейный парк», «Лоскуток», «Колибри» таҥас маҕаһыыннара спонсордаатылар, бэйэлэрин бириистэрин туруордулар.
Үлэлииргэ үчүгэй усулуобуйа оҥоһуллан, уопсай айар эйгэ баара иистэнньэҥнэри үлэҕэ кынаттаата. Куонкуруһу тэрийээччилэргэ истиҥ махталбытын тириэрдэбит.
Мария Винокурова