1 Хомустаахха тэрилтэлэр икки ардыларыгар олунньу 5-7 күннэригэр волейболга баһылык Кубогар күрэхтэһии буолбут.
Күрэхтэһиигэ 7 хамаанда күрэхтэспитин спортинструктор Юрий Николаев иһитиннэрэр. Үс күн устата 60 кэриҥэ киһи волейболунан олорбут. Урукку сылларга үлэ чааһын кэнниттэн нэһилиэк дьоно-сэргэтэ спорт саалаларга тоҕуоруһа мустарын хомустаахтар санаттылар.
“Тирии мээчик” күөрэйдэ, тэрилтэ үлэһиттэрэ спорт саалаҕа түмүстүлэр, сатаабаппыт диэн хайалара да туора турбата. Оонньоочуулар бары эрбии тииһин курдук, араа-бараа түсүһэн бэрт сэргэх, интэриэһинэй киирсиилэри көрдөрүлэр.
Оҕолорбут спорка сайдан иһэллэриттэн үөрэбит. Чөл олоҕу тутуһар ыччаттаах нэһилиэк, инникитин нэһилиэк сайдарыгар эрэли үөскэтэр”, – диир Юрий Александрович.
3 очукуолаах 7 миэстэ “Алгыс” НАК, НКТЭ, УГРС холбоһуктаах хамаандата. 5 очукуолаах 6 миэстэ МПЧ, балыыһа, музыкальнай оскуола хамаандата. 7 очукуолаах 5 миэстэ “Мичийээнэ”, “Улыбка” уһуйааннар хамаандалара. 8 очукуолаах 4 миэстэ оскуола коллективын хамаандата. 8 очукуолаах бириистээх 3 миэстэҕэ “Аартык” маҕаһыын коллектива тахсыбыт. 9 очукуолаах 2 миэстэ олохтоох дьаһалта, МАУ хамаандата буолар. 6 ооньууттан 5-гэр кыайан Баһылык Кубогын эрэллээхтик 11 очукуолаах оскуола үөрэнээччилэрин хамаандата ылбыт.
Наммыт улууһун хас биирдии нэһилиэгэр маннык сэргэх олох уһуннун, хас биирдии тэрилтэ көхтөөх буолуу хамсааһыныгар кыттыстын. Күрэхтэһиилэр, тэрээһиннэр элбии турдуннар, буола турдуннар!
Харысхан Попов