Хаары туйахтарынан батарыта үктээн, үрүҥ мөһүүрэни көтүтэн, сылгыһыттарбыт айаннатан иһэллэр… Кинилэр тыйыс да тымныыга, сырылас да куйааска быстыспат доҕордоро — аттара.
Нам улууһун Хомустаах Бастакы нэһилиэгэр “Кубалаах” алаас ипподромугар бүгүн Нам улууһун «Нам» совхоз туйгун чемпион сылгыһыттарын, наставниктарын Авксентий Тимофеевич Аргунов, Петр Тимофеевич Григорьев, Иван Андреевич Муксунов, Павел Гаврильевич Николаев сырдык кэриэстэригэр “Сылгыһыт күрэҕэ – 2024” үөрүүлээх быһыыга-майгыга аһылынна.
Улуустааҕы күрэххэ Үөдэй, Никольскай, Аппааны, Модут, Хомустаах Бастакы нэһилиэк икки хамаандалара күөн көрсөөрү, күүстэрин-уохтарын тэҥнээри, кыайыы үрдүк чыпчаалын оройуттан тутаары көрө-истэ сылдьаллар. «Кубалаах» алаас былыргы сир буоларын туоһутунан сиэри-туому тутуһан, сир дойду иччилэриттэн көҥүл ылан, олохтоох алгысчыт Алексей Кривогорницын уот оттон айах тутта. Өймөкөөн улууһун бочуоттаах олохтоохо, сылгыһыт Дугуйдан Винокуров күндү ыалдьыт буолан кэлэн, эҕэрдэ тылын эттэ. Олохтоох дьаһалта үлэһиттэрэ тэрээһин ыалдьыттарыгар анаан ис миинэ буһардылар, итии үүттээх чэй миэстэтигэр оргутуллан, кэлбит дьону сылааһынан угуттуур.
14:00 чаастан 1 Хомустаах Алгыс норуот айымньытын киинигэр “Нам улууһугар сылгы иитиитин сайыннарыы” форум буолуоҕа.
15:00 чаастан Нам улууһун норуот маастардарын киэҥ быыстапката тэриллиэҕэ.
Лена Корякина