0Нам улууһун баһылыгын солбуйааччы Филипп Николаев салайар 3-с бөлөҕө отчуоттуур үлэни 1-кы Хомустааҕынан бүтэрдэ.
Отчуоттуур 3-с бөлөх бу күннэргэ Фрунзе, Түбэ, Никольскай, Партизан, Үөдэй, 1-кы Хомустаах дьонун-сэргэтин туруорсуутун уонна этиитин иһиттэ. Бу сылга туох үлэлэр ыытыллалларын сурунна, боротокуолга тистэ.
1-кы Хомустаах-Нам айан сырыытын оҥорор маршрут туруорсар. Манна көрүүлэр, үлэлэр ыытыллаллара этилиннэ.
1-кы Хомустаахха «Хаарбах дьиэттэн дьону көһөрүү» федеральнай программанан үгүс саҥа дьиэлэр тутуулара бардылар эрээри, социальнай объектары көрдөххө, саҥа тутуллубуттарга уһуйааны киллэриэххэ сөп. Улахан киин нэһилиэктэртэн 1-кы Хомустаах эрэ саҥа оскуолалана илик диэн ааттыыр кэм кэлбит. 1-кы Хомустаах оскуолата хаһааҥҥы диэри капитальнай өрөмүөнүнэн муҥурданар. Саҥа тутуу барарын оскуола дириэктэрэ Ульяна Атласова туруорсар. Ону тэҥэ, балыыһа олус тымныы буоларынан капитальнай өрөмүөн ыытылларыгар эрэнэллэрин этэллэр.
Улуус соҕуруу нэһилиэктэрэ уотунан хааччылыыга кыһалҕары көрсөллөрүн хомустаахтар туоһулууллар. Нэһилиэк сиригэр-уотугар киирэр ыччат кварталын ыалларын хабар уот ситимэ Партизан нэһилиэгэр холбоһоруттан кыһалҕалары көрсөллөрүн ахтан аастылар. Холобура, Партизаҥҥа сотору-сотору уот барар түгэнигэр Хомустаах ыаллара эмиэ уота суох хаалаллар эбит.
Олохтоохтор «Якутскэкосети» тэрилтэ үлэтиттэн толору астымматтарын биллэрдилэр. Ол курдук, бу ыйытыы үгүс нэһилиэккэ тахсар. Бөҕү-сыыһы хомуйар «Якутскэкосети» тэрилтэ үлэтэ ылыыга-тиэрдиигэ олоҕурарын Филипп Васильевич быһаарар.
Тыа хаһаайыстыбатыгар, үүт туттарыытын сыанатын үрдэтэргэ этии киллэрэллэр. Аны, от оттооһунугар, билиҥҥи кэмҥэ ынахтаах киһи оттууругар ходуһата, сирэ суох. Сөптөөх быһаарыныы олоҕурар: ынаҕа-сүөһүтэ суох ходуһа хаһаайынын кытта өр кэмнээх бириэмэҕэ дуогабардаһарга. Оччотугар ходуһа да туһаҕа барар, сирин уларсыбыт хаһаайын да эттээх, астаах хаалыа этэ.
1-кы Хомустаах аҕам саастаахтарын санаалара эмиэ үөдэйдэргэ холбоһор — кырдьаҕас дьон лааҕырдарын тэрийии.
Харысхан Попов