Бүгүн «Нам улууһа» МТ дьаһалтатын 2024 сыллааҕы үлэтин отчуота саҕаланна. Улуус баһылыгын бастакы солбуйааччыта Анатолий Павлов салайар 2-с бөлөҕө 2 Хомустаахха ааспыт сыллааҕы үлэни отчуоттаата. Ааспыт сылга ыытыллыбыт үлэни бары салааны хабан видеонан көрдөрдүлэр. Отчуокка 40-тан тахса киһи сырытта.
Халаан уутун содулун туоратыыга, чөлүгэр түһэриигэ үлэлэспит, күүс-көмө буолбут олохтоохторго бочуотунай бэлиэ, тэрилтэлэргэ махтал сурук туттардылар.
Ааспыт сылга олохтоохтор туруорсууларын, боппуруостарын ырыттылар. Ол курдук, оскуола интернатын тутуу боппуруоһун үлэтэ, аллараттан дьону көһөрүү салгыы барар. «Эрэл» ТХПК үүт тутар собуотун Сэргэлээххэ көһөрөргө сир тыырыытын үлэтин ыыталлар. Үүт туттарар дьон аҕыйах буолан ааспыт сылга үүт туппатахтар. Онон олохтоохтортон тутулуктааҕын эттилэр. Көрүүтэ-истиитэ суох бэйдиэ сылдьар ыттары кытары үлэҕэ олохтоммут дьаһалынан ыстараапка түһэрэн иһиэххэ наада диэтилэр.
Оскуола директора Александр Старков оскуолаҕа үөрэнээччи ахсаана сыллата элбии турарын этэн туран, интернат тутуутун уонна оскуолаҕа улахан өрөмүөн ыытыллыах сайаапкатын түргэтэтэргэ болҕомто ууралларыгар, итиэннэ ититэр систиэмэтэ көрүүгэ-истиигэ наадыйарын эттэ. Уһуйааҥҥа салгын хамсатар канаалы туһаныыга сүбэ-ама наадатын уонна убаҕас тобох барар турбатын ситэри оҥорорго туруорустулар.
Сүөһү иитэр дьон үксэ аллараа бөһүөлэккэ олороллорун этэн туран, Сэргэлээххэ көһөн тахсарга саҥа дьиэ, хотон тутуута бииргэ кыаллыбатын этэн туран, хотон тутуутугар субсидия көрүллэр дуо диэн ыйытыыга, кэтэх хаһаайыстыбалаахтарга көмө суох диэн хоруй ыллылар. Ынахха көрүллэр 39 тыһ. солк. субсидия «Госуслуга» портал нөҥүө сайаапкаланарын эттилэр.
Нэһилиэккэ биир тыын суолталаах боппуруоһунан быраас миэстэтэ аһаҕас турара буолар. Сайынын уунан сылдьар буолан, дьону таһыыга болҕомто ууралларыгар эттилэр. Олох-дьаһах коммунальнай хаһаайыстыбатыгар ититэр ситими тупсарыы үлэтин ыытыыга туруорустулар. Улууска ыытыллар саҥа тутууларга хаачыстыбаҕа улахан болҕомто ууралларыгар эттилэр.
Нам улууһун дьаһалтатын ааспыт 2024 сыллааҕы үлэтин олохтоохтортон 2 туттуммут киһиттэн ураты биһирииллэрин биллэрдилэр.
Семен Аргунов