Балаҕан ыйын 7 күнүгэр Нам улууһун 2 Хомустаах нэһилиэгэр дьону-сэргэни түмэр, оҕону-урууну, ыччаты кэрэ эйгэҕэ, спорка уһуйар киин саҥа дьиэтэ үлэҕэ киирэр үөрүүлээх тэрээһинэ ыытылынна.
— Бүгүн биһиэхэ долгутуулаах, олус үөрүүлээх күммүт үүннэ, 2013 сылтан кэтэспит тутуубут – элбэх функциялаах култуура уонна спорт киинэ үлэҕэ киирдэ. Биһиги 2018 сыллаахха «Мин Сахам сирэ XXI үйэҕэ» үтүө дьыала программатыгар киирэн элбэх өрүттээх үлэни ыытаммыт, бэдэрээччиппит «ЭКОФОРС» ХЭТ таһаарыылаахтык тутан, нэһилиэгим дьоно-сэргэтэ өрө көтөҕүллэн кыттыытынан,кииммит үлэҕэ киирэрин ситистибит. Онон күүтүүлээх эбийиэкпит арыллыбытынан дириҥ махтал тылларын өрөспүүбүлүкэбит Ил Дарханыгар, Правительствотыгар, тутуу уонна архитектура министиэристибэтигэр, улууспут дьаһалтатыгар, тутууга алтыспыт тэрилтэлэрбитигэр, бэдэрээччиппитигэр аныыбыт. Уонна нэһилиэгим олохтоохторугар, тэрилтэлэрим салайааччыларыгар, үлэһиттэригэр, общественнай түмсүүлэрбитигэр, кырдьаҕастарбытыгар, эдэр ыччаппытыгар субуотунньуктарга кыттан, көмөҕө биир киһи курдук тахсан үлэлээбиккит, өйөөбүккүт иһин улахан махталбын тиэрдэбин. Бары биир санаанан салайтарар буоламмыт кыайабыт-хотобут, иннибит диэки сайдыы суолун тутуһабыт дии саныыбын.
Икки этээстээх 800-тэн тахса кв.м. иэннээх эбийиэкпитигэр итиитэ киирэн турар, манна элбэх тэрилтэ түмүллэн киирдэ – олохтоох дьаһалта, “Сэргэлээх” норуот айымньытын киинэ, нэһилиэкпит библиотеката, спортпут, почтабыт, олохтоох музейбыт. Кырдьаҕастарбытыгар, общественнай түмсүүлэрбитигэр хос анаатыбыт, ону сэргэ уратыбыт диэн – ЗАГС хоһун эмиэ бэлэмнээтибит, ол саахсаланыыга, эдэр ыаллар оҕолорун ааттарын-суолларын суруйтарыыларыгар ананан үлэлиэҕэ, — санаатын тиэртэ нэһилиэк баһылыга Лев Новгородов.
Култуура уонна спорт киинин саҥа сырдык, сылаас, киэҥ уораҕайыгар 2 Хомустаах нэһилиэгин дьонун, оҕолорун, эдэрыччатын билиигэ-көрүүгэ, кэрэҕэ, чөл олоххо тиэрдэр суола нэлэһийэ арылынна.
#ЯкутияВперед
Касьян Олесов-Олук