Тыа сиригэр аҕа саастаах көлүөнэ дьон сүөһү, сылгы иитиитигэр бэриниилээхтик үлэлээбитэ. Олох тэтимнээхтик сайдар кэмигэр кинилэртэн үгүстэрэ өбүгэбит төрүт дьарыгын олохторун устатыгар ыһыктыбатахтара. Оҕолоро, ыччаттара кинилэр үтүө холобурдарынан бу үлэҕэ сыстыбыттара, утумнаабыттара. Үлэ сылынан тыа хаһаайыстыбатыгар удьуордаан үлэлээбит уонна билигин да үлэлиир дьонноох Нам Таастаҕыттан силистээх, Партизан нэһилиэгэр олохсуйбут Баишевтар дьиэ кэргэни билсиҥ.
Үлэ династиятын төрүттээччинэн улахан дьиэ кэргэн аҕа баһылыга Баишев Афанасий Леонтьевич (1929-2004 сс.) буолар. Олоҕун барытын тыа хаһаайыстыбатыгар анаабыта. Кыратыттан колхозка 15 сыл үлэлээбитэ, онтон «Нам» совхозка сылгы көрөөччүнэн, биригэдьииринэн, техник-осеменаторынан, кэлин «Партизан» совхозка үтүө суобастаахтык үлэлээбитэ, «Коммунистическай үлэ ударнига» (1974 с.), «Социалистическай үлэ ударнига» (1976 с.), тыа хаһаайыстыбатын министиэристибэтиттэн, оройуонун, совхоһун салалтатыттан, нэһилиэгиттэн элбэх Бочуотунай грамоталардаах, махтал суруктардаах, үлэ, тыыл бэтэрээнэ.
Илларионова Ефросинья Петровна (1935-2007 сс.) кини кэргэнэ, Уус Алдан оройуонун Найахытыттан төрүттээх, сааһын тухары эмиэ тыа хаһаайыстыбатыгар үлэлээбитэ, кыратыттан колхозка, кэлин совхозка ыанньыксыттаабыта, «Нам» совхозка үлэлии сылдьан килбиэннээх үлэтин иһин «Бочуот знага» (1973 с.) уордьанынан наҕараадаламмыта, XI, X, XI пятилеткалар ударниктара, Социалистическай куоталаһыы кыайыылааҕа (1976 с.), «Саха АССР норуотун хаһаайыстыбатын үтүөлээх үлэһитэ», В.И. Ленин 100 сылынан үбүлүөйнэй уонна 5 оҕотун көрүүтүн иһин «Ийэ буолуу» мэтээллэрдээх, үлэ бэтэрээнэ (1985 с.), Нам улууһун Бочуоттаах гражданина (1995 с.).
Баишев Петр Афанасьевич-улахан уоллара, Улан-Удэтээҕи индустриальнай-педагогическай учлищены бүтэрэн, 1981 с. ылбыт идэтинэн «Нам» совхозка наладчигынан, сүөһү көрөр хотоннору, фермалары механизациялааһын инженеринэн, кэлин «Партизан» совхозка үлэлээбитэ. Совхозтар ыһыллыбыттарын кэнниттэн 1996 с. ынах сүөһүнү, сылгыны көрөр, туорахтаах культураны, хортуоппуйу үүннэрэр «Сындыыс» бааһынай хаһаайыстыбаны тэрийэн таһаарыылаахтык үлэлээбитэ.
Сындыыс – аҕалара эдэригэр сүүрдүбүт, улууска, өрөспүүбүлүкэҕэ 4800 м. иннин биэрбэтэх, өрөгөйдөөөн сүүрэ сылдьыбыт сүүрүк сылгы, Петр Афанасьевич бааһынай хаһаайыстыбатын онон ааттаабыта. Баишевтарга аҕаларын бииргэ төрөөбүт убайа Егор Леонтьевич Баишев-Саххаанай Аҕа дойду Улуу сэриитин иннинэ Үөдэй нэһилиэгин «Буденнай» колхоһуттан үс саастаах атыыр тыйы атыылаһан Таастаахха «Өктөөп уота» колхозка аҕалбыт, Сындыыс диэн ааттаабыт, Ойуурдаах алааска биэбэйдээн ииппит, бэйэтэ ыҥыырга айааһаабыт. Егор Леонтьевич республика бастыҥ сылгыһыта буолан, 1939 с. Москва куоракка ВДНХ-ҕа кыттыбыт, республика сылгыһыттарын ортотугар биир бастакынан «Үлэ Кыһыл Знамята» уордьанынан наҕараадаламмыт. Кини 1942 с. ыам ыйын 26 күнүгэр иккис хомуурга ыҥырыллан сэриигэ барбыт уонна ити сыл алтынньы 1 күнүгэр Калининскай уобалас Ржевскэй оройуонун Опеки дэриэбинэтигэр сырдык тыына быстыбыт. Бу аймахтыылар бэйэлэрэ көрөн-истэн улаатыннарбыт, кэлин аатырбыт-сураҕырбыт атыыр сүүрүк Сындыыстарыттан удьуор сүүрүк төрүөҕү: Сындыыс II, Үскэл, Рычаг, Спутник ылбыттара. Билигин Афанасий Леонтьевич Баишев оҕолоро, аймахтара улууска «Сындыыс кубога» ат сүүрдүүтүн күрэхтэһиитин тэрийэн, үгэскэ кубулутан ыыталлар.
Петр Афанасьевич Баишев тыа хаһаайыстыбатыгар сыралаах үлэтэ сыаналанан 2014 с. «СР тыатын хаһаайыстыбатын туйгуна» бэлиэнэн наҕараадаламмыта, 2016 с. «СР үтүөлээх фермерэ» үрдүк ааты сүкпүтэ, «Саха сирин тыатын хаһаайыстыбатын бэтэрээнэ» (2022 с.), «Олохтоох бэйэни салайыныыны өйөөһүнүн иһин» бэлиэлэрдээх, Партизан нэһилиэгин Бочуоттаах гражданина (2019 с.), үлэ бэтэрээнэ, кэргэннээх, 3 оҕолоохтор, 7 сиэннээхтэр.
Баишева-Саввинова Джулуяна Афанасьевна — иккис кыыстара, Дьокуускайдааҕы тыа хаһаайыстыбатын техникумун, онтон Дьокуускайдааҕы тыа хаһаайыстыбатын Академиятын бүтэрбитэ, билигин идэтинэн Партизан нэһилиэгин ветеринарнай учаастагын сэбиэдиссэйинэн ситиһиилээхтик үлэлиир, тэрилтэтэ кэккэ сылларга «Сыл бастыҥ ветеринарнай учаастага» номинацияны, оттон бэйэтэ «Сыл бастыҥ ветеринарнай бырааһа» ааты ылбыта, «СР тыатын хаһаайыстыбатын туйгуна», «СР АПК сайдыытыгар кылаатын иһин» бэлиэлээх, бэйэлэрэ кэтэх хаһаайыстыбаны эмиэ туталлар, барыта 8 төбө сүөһүлээхтэр, онтон үһэ ыанар ынах, сайыҥҥы кэмҥэ дьиэ кэргэнинэн оттууллар, үүттэрин «Эрэл» ТХПК-ҕа туттараллар, нэһилиэгин общественнай олоҕор көхтөөхтүк кыттар, олорор сирин «Парковай» түөлбэтин начальнига, кэргэннээх, 8 оҕолоохтор, 8 сиэннээхтэр.
Баишева-Лугинова Дария Афанасьевна — үһүс кыыстара, Улан-Удэтээҕи тыа хаһаайыстыбатын институтун бүтэрбитэ, 1994 с. Салбаҥнааҕы ветеринарнай учаастак сэбиэдиссэйинэн эҥкилэ суох үлэлээбитэ, «СР тыатын хаһаайыстыбатын туйгуна» (2014 с.), «СР ветеринарнай сулууспатын туйгуна» (2020 с.), «Нам улууһа сайдыытыгар кылаатын иһин», «Салбаҥ нэһилиэгэ сайдыытыгар кылаатын иһин» бэлиэлэрдээх, бастыҥ общественница, нэһилиэк сэбиэтин 4 ыҥырыытын депутата, кэргэннээх, 2 оҕолоохтор, сиэннээхтэр.
Кини кэргэнэ Лугинов Валерий Петрович илиитин араарбакка сылгы иитиитинэн дьарыктанар, «Сындыыс кубогар» ыытыллар ат сүүрдүүтүгэр өрүү спонсордыыр.
Баишев Петр Афанасьевич – кыра уоллара, 2012 с. убайын утумнаан «Сындыыс» бааһынай хаһаайыстыбаны илиитигэр туппута, 2014 с. Партизан нэһилиэгэр тэриллибит агрокластерга икки хотонунан 100-чэ төбө сүөһүнү иитэр, онтон 40-чата ыанар ынах, ону сэргэ анал баазаҕа 80-тан тахса сылгыны көрөр, бааһынай хаһаайыстыбатын кэскиллээхтик дьаһанан сайыннарар, «СР тыатын хаһаайыстыбатын туйгуна», СР тыатын хаһаайыстыбатын министиэристибэтиттэн Бочуотунай грамоталаах (2018 с.), кэргэннээх, 6 оҕолоохтор, 4 сиэннээхтэр.
Ити курдук, 299 сыл үлэ ыстаастаах Баишевтар үлэни өрө тутан, тыа сирэ чэчирии сайдарыгар ынах, сылгы иитиигэр үтүө суобастаахтык үлэлииллэр, эти-үүтү дэлэтэллэр.
Касьян Олесов-Олук