Атырдьах ыйын 1 күнүттэн Хатыҥ Арыы нэһилиэгэр 8 оҕолоох «Бригантина» сервиснэй этэрээтэ үлэтин саҕалаата.
Манна Аппааныга 5 оҕо, Граф Биэрэгэр 3 оҕо, Кыайыы сквердарыгар, И.Д. Винокуров-Чаҕылҕан скверыгар, Алроса аллеятыгар сибэккилэргэ, мастарга уу кутуохтара, уулуссалар, оҕо былаһааккалара ыраас буолалларын ситиһиэхтэрэ, өрүс кытыытын ыраастаан нэһилиэкпит тупсаҕай көстүүлээх буоларыгар үлэлэһиэхтэрэ.
Волонтер оҕолору үс сезон устата Надежда Сивцева, Саргылана Сметанина салайан илдьэ сылдьаллар.
Уопсайа сайын устата олохтоох дьаһалта уонна Намнааҕы үлэлээх буолуу киин нөҥүө 35 оҕону сайыҥҥы кэмҥэ быстах үлэннэн хааччыйда.
Волонтер оҕолор ааттарыттан нэһилиэкпит баһылыгар Иван Ноговицыҥҥа уонна Намнааҕы үлэнэн хааччыйар киин начальнигар Гаврил Николаевка, оҕолору госуслуги нөҥүө киллэрэргэ күүскэ үлэлэспит, күүс-көмө буолар Намнааҕы киин исписэлииһигэр Антонина Филипповаҕа махтал тылларын тиэрдэллэр.
Надежда Сивцева