Нам улууһун Хатырыгар дойдуга бэриниилээх буолууга туһаайар, дойду үрдүнэн педагог уонна уһуйааччы, Саха өрөспүүбүлүкэтигэр үлэ, Нам улууһугар биир санааланыы уонна сомоҕолоһуу сылыгар анаммыт М.К. Аммосов кубогар өрөспүүбүлүкэтээҕи ыччат культураҕа уонна спорка слетун бүгүн иккис күнэ.
Слет саамай интэриэһинэй, умнуллубат түгэннэрэ бүгүн буола тураллар. Ол курдук, СӨ правительствотын председателин солбуйааччыта Сергей Местников, улууспут салайааччылара, биир дойдулаахтарбыт, үрдүк сололоохтор, хамаандалар капитаннара саха чулуу уолана Максим Аммосов үйэлэргэ симэлийбэт сырдык аатыгар сүгүрүйэн, махтанан туран сибэкки дьөрбөтүн уурдулар.
Өрөспүүбүлүкэ скверигэр кыттааччылар сэлэлии хааман киирэн, ыҥырыылаах ыалдьыттар эҕэрдэлэрин истэн, үөрүүлээх быһыыга-майгыга тоҕуоруһа мустан, слет саҕаламмытын бэлиэтээн бырайыак ааптара Ариан Татаринов уонна хамаандалар капитаннара ыччат слетун былааҕын күөрэччи көтөхтүлэр.
Кыайыыга дьулууру саҕар эҕэрдэ тыллар этиллибиттэрин кэнниттэн эрчимнээх, көхтөөх, культураны, спорду тэҥинэн өрө тутар ыччакка наҕараадалары туттардылар.
Ити кэнниттэн СӨ тыатын хаһаайыстыбатын министрин Александр Атласовы, СӨ эдэр ыччат дьыалатыгар уонна социальнай коммуникацияҕа министрин солбуйааччытын Надежда Мохначевскаяны, Нам улууһун баһылыгын Юрий Слепцову кытары аһаҕастык санаа атастастылар.
Күн иккис аҥаарыттан спортивнай күрэхтэһиилэр саҕаланнылар — чэпчэки атлетика4х200, волейбол 3х3, хапсаҕай (стенка на стенку), бастакы суһал көмөнү оҥоруу, канаат тардыһыыта, эстафета (Веселые старты). Хамаандалар сарсын бу түһүмэхтэргэ финаллыахтара.
Киэһэ Өймөкөөн сылгыһыта, экстремал-айанньыт Дугуйдан Винокуровы кытта көрсүһүү буолуоҕа. Икки күнү Гоша Васильев-Джида кыттыылаах ырыалаах-тойуктаах үҥкүү-битии түмүктүөҕэ.
Семен Аргунов
Сиһилии хаһыат кэлэр нүөмэригэр ааҕаарыҥ