Дьокуускай куоракка VIII-с «Азия оҕолоро» норуоттар икки ардыларынааҕы спортивнай оонньуулар күннэтэ ыытылла тураллар.
Биһиги улууспутуттан, нэһилиэкпититтэн күрэхтэһиилэргэ, араас сылларга тэрээһиннэргэ кыттыыны ылбыт оҕолорбутун сырдатабыт.
Мин иннибэр бэртээхэй альбом сытар. 2008 сыллааҕы IV «Азия оҕолоро» оонньуу культурнай программатыгар Хамаҕатта нэһилиэгин музыкальнай оскуолатын «Радуга» оҕо үҥкүү ансамбылын ол кэмнэри кэпсиир өйдөбүнньүк альбома.
Салайааччылар — СӨ култууратын үтүөлээх үлэһитэ Любовь Андросова, Елена Лыткина, Римма Татаринова.
«Азия оҕолоро» оонньууга спортсменнары кэккэ культурнай программатыгар 4,5 тыһ. оҕо, ол иһигэр 2 тыһ. оҕо фоновай трибунаҕа олорон кыттыбыттара биллэр.
«Радуга» үҥкүү бөлөхтөн 24 буолан оонньуу үөрүүлээх аһыллыытыгар, сабыллыытыгар, оонньуу символа мамонтеногы кытта самбо, улахан оҕолор Бирма норуотун үҥкүүлэрин толорбуттар. Массовкаҕа күн сардаҥаларын, хомус ойуулааһыныгар киирбиттэр. Эрдэттэн киирэн ДЬПУ уопсай дьиэтигэр хоно сытан күҥҥэ иккитэ дьарыктанан, куйааһы, сылайбыттарын аахсыбакка бэлэмнэммиттэр. Оонньуу кэмигэр «Мамонтенок» бэстибээлгэ сылдьыбыттар, тыйаатырга спектакль, киинэ көрбүттэр.
Норуоттар икки ардыларынааҕы спортивнай оонньууга кыттыы — умнуллубат түгэн. Ол курдук спорт сомоҕолуур, культура түмэр.