Бэҕэһээ, алтынньы 30 күнүгэр, Аппааны бөһүөлэгин Хатыҥ Арыытааҕы И.Е. Винокуров аатынан кыраайы уонна историяны үөрэтэр түмэлгэ “Ааспыт кэмнэри санатан…” быыстапка аһылынна.
Тэрээһини түмэл быыстапкалары тэрийэр специалиһа Михаил Нестерев иилээн-саҕалаан ыытта. Мустубут ыалдьыттары сэбиэдиссэй Афанасий Христофоров Комсомол 105 сылынан, кэлэн иһэр Сомоҕолоһуу уонна өрөгөйдөөх Өктөөп күннэринэн түмэл коллективын аатыттан эҕэрдэлээтэ, итиэннэ быыстапкаҕа аналлаах маллары аҕалан дьон дьүүлүгэр таһаарбыт Надежда Сивцеваҕа, Туяра Ядриханскаяҕа махтал суруктары туттарда. Быыстапка аһыллыытын аалай лиэнтэтин Афанасий Христофоров, Надежда Сивцева быстылар.
“Ааспыт кэмнэри санатан…” быыстапкаҕа Надежда Сивцева, Марианна Винокурова, Туяра Ядрихинская, Людмила Петрова бэйэлэрин коллекцияларыттан экспонаттары аҕалан туруордулар. Кинилэр сүрүн үлэлэрин таһынан сөбүлүүр дьарыктаахтар. Ол курдук, урукку кэмҥэ туттуллубут маллары, таҥаһы-сабы, араас иһиттэри, открыткалары о.д.а. коллекциялыыллар. Төрөппүттэриттэн кэриэс буолан хаалбыт иһиттэр-хомуостар, таҥастар-саптар мунньуллан, биир улахан коллекция буолан, көрдөрүүгэ тахсан дьон кэрэхсибилин ылаллар. Ону тэҥэ, быыстапкаҕа түмэл фондатыттан экспонаттар бааллар.
Ааспыт кэм кэрэһитэ буолар коллекцияны харыстаан, кэҥэтэн кэнчээри ыччакка тиэрдэр биһиги ытык иэспит буолар. Быыстапка биир нэдиэлэ устата дьон сэҥээриитигэр туруоҕа.
Надежда Сивцева