Ааспыт сыл түмүгүнэн Хатыҥ Арыы нэһилиэгэ инники күөҥҥэ таҕыста

Хатыҥ Арыы нэһилиэгин дьаһалтата 2024 сыл түмүгүнэн улахан нэһилиэктэр дьаһалталарын икки ардыларыгар бочуоттаах бастакы миэстэни ылары ситистэ.

Тохсунньу 24 күнүгэр Нам сэлиэнньэтигэр М.К. Аммосов аатынан культура уонна духуобунай сайдыы дыбарыаһыгар Нам улууһун дьаһалталарын 2024 сыл түмүгүн таһаарар үөрүлээх тэрээһин буолан ааста.

Нэһилиэкпит баһылыга Иван Ноговицын Ил Түмэн тыа хаһаайыстыбатын уонна аграрнай политика сис кэмитиэтин председателэ Александр Павлович Атласов бочуотунай грамотатын уонна Дьокуускайдааҕы региональнай отделение Бүтүн сойуустааҕы «Биир ньыгыл Россия» партиятын салайааччытыттан С.В. Заболоцкай махтал суругун тутта. Бу күн нэһилиэкпит олохтоохторо Хатыҥ Арыытааҕы И.Е. Винокуров аатынан историяны уонна кыраайы үөрэтэр түмэл сэбиэдиссэйинэн үлэлээбит Афанасий Христофоровка СӨ Правительствотын махтал суругун, Хатыҥ Арыы олохтоох дьаһалтатын бухгалтера Надежда Дьяконова СӨ Олохтоох бэйэни салайыныыны өйөөһүн иһин СӨ муниципальнай тэриллиилэрин сэбиэтин махтал бэлиэтин, нэһилиэкпит эдэр кэскиллээх ыччата индивидуальнай предприниматель, бааһынай хаһаайыстыба баһылыга Арыйан Винокуров СӨ Правительствотын грамотатын, Граф Биэрэгин олохтооҕо, үлэ бэтэрээнэ Валентина Эверстова «Нам улууһун МТ сайдыытыгар киллэрбит кылаатын иһин» бочуоттаах бэлиэни туттулар.

Дьаһалта ыытар сүрүн хайысхаларынан анал номинацияларга нэһилиэкпит маннык ситиһиилэннэ:

— «Тутуу уонна градостроительнай докумуон эйгэтигэр бастыҥ муниципальнай тэриллии» — 1 миэстэ;

— «Куттал суох буолуутун хааччайыы эйэгэтигэр бастыҥ муниципальнай тэриллии» — 2 миэстэ;

— «Тыа хаһаайыстыбатын эйгэтигэр бастыҥ муниципальнай тэриллии» — 1 миэстэ;

— «Урбаан эйгэтигэр бастыҥ муниципальнай тэриллии» — 1 миэстэ;

— «Спорт уонна физическай культура эйгэтигэр бастыҥ муниципальнай тэриллии» — 1 миэстэ;

— «Культура эйгэтигэр бастыҥ муниципальнай тэриллии» — 2 миэстэ;

— «Культуура тэрээһинин уонна кадр политикатын эйгэтигэр бастыҥ муниципальнай тэриллии» — 1 миэстэ;

— «Ыччат политикатын эйгэтигэр бастыҥ муниципальнай тэриллии» — 3 миэстэ;

— «Дьиэ кэргэн уонна общественнай политика эйгэтигэр бастыҥ муниципальнай тэриллии» — 3 миэстэ буолары ситистилэр. Уонна уопсай түмүккэ, үһүс бөлөххө улахан нэһилиэктэргэ, 2024 сыл түмүгүнэн бастыҥ үлэлээх муниципальнай тэриллии буолан, 100 тыһ. солк. сертификатынан наҕараадаланнылар.

Ааспыт 2024 сылга нэһилиэкпит дьоно-сэргэтэ улахан сааскы халаан уутун содулун сэрэтиигэ, туоратыыга үгүс үлэ ыытыллыбыта, байыаннай дьайыыга сылдьар байыастарга бары биир санаанан көмөлөһөммүт араас бачыымнарга көхтөөхтүк кытынныбыт, маны тэҥэ культурнай, спортивнай, общественнай, социальнай хайысхаларга бары бииргэ буоламмыт кыайыы өрөгөйүн биллибит.

Нэһилиэкпит тэрилтэлэригэр, тэриниилээх хаһаайыстыбаларга, урбаанньыттарга, общественностка, нэһилиэкпит киэн туттар, сүбэ-ама биэрэр тутаах ытык дьоммутугар, культура, үөрэҕэрии, доруобуйа, спорт, тыа хаһаайыстыбатын эйгэтигэр үлэлиир үтүө дьоммутугар, хас биирдии нэһилиэкпит олохтооҕор, ыччакка махтанабыт. Бу курдук түмсүүлээх буолан өссө да өрүүтүн инники хардыылаан, дабайан иһиэҕин!

Надежда Сивцева, Аппааны

Читайте дальше