Айар куттаахтар үлэлэрэ дьону-сэргэни үөрдэр

Нам сэлиэнньэтин олохтоохторугар ыытыллыбыт “Зимняя сказка” аһаҕас күрэххэ 5 кыттааччы бэйэтин айар талаанын көрдөрөн хаар оҥоһуктары оҥорбута.

Манна 2025 сыл бэлиэтэ Моҕой, нуучча, саха норуотугар ситимнээх хаар оҥоһуктар оҥоһуллан, чочуллан тахсаннар Доҕордоһуу болуоссатыгар турбуттара, дьон кэрэхсибилин ылбыттара.

Ленскэй нэһилиэк олохтоох дьаһалтата тэрийбит хаар оҥоһугун күрэҕэр Василий Никитин “По щучьему велению” айар үлэтэ кыайыылааҕынан ааттанан 20 000 солк. наҕаарадаламмыта. Иккис миэстэлээх Сандал Иванов “Ый кыыһын” оҥоһуга тахсан 13 000 солк. ылбыта. Семен Стручков “Колобок” остуоруйаттан оҥорбут хаар оҥоһуга үһүс бочуоттаах миэстэни ылан 7000 солк. наҕараадаланар.

Биһирэбил бириистэринэн Андрей Данилов “Хорсун куобах” уонна Валерий Бочкарев “Моруос оҕонньор Хаарчаанатынаан” оҥоһуктара ааттаналлар.

“Ый кыыһа” айымньыны оҥоруу эрдэттэн былааҥҥа баара. Оччотугар, күрэххэ кыттан өйбөр итиэйэхтии сылдьыбыт айымньым олоххо киирэр кэмэ кэлэн оҥоһулунна диэн ааттанар. Хаардара чиҥ, кытаанах, табыгастаах буолан үлэбит биир күн устата барбыта. Күүс-көмө буолбут доҕорбор Иннокентий Суздаловка махтанабын.

Маннык бэрт үчүгэй бириистээх күрэхтэри олохтоох дьаһалта эрэ барыта оҥорбот. Ленскэй нэһилиэк олохтоох дьаһалтата бэрт үчүгэй күрэҕи тэрийэн дьону-сэргэни үөртэ диэн сыаналыахха сөп. DNS маҕаһыыҥҥа 13 000 суумаҕа бэриллибит сертификаппынан Саҥа дьыллааҕы бэлэхтэри үөрэ-көтө ылбыппыт”, – диир Сандал Иванов.

Саҥа Дьылы умнуллубат уһулуччу үчүгэй айымньыларынан киэргэппит тарбахтарыгар талааннаахтарга, айар куттаахтарга махтанабыт!

Видео — Роман Шапошников

Харысхан Попов

Читайте дальше