Атырдьах ыйын 11-13 күннэригэр Үөһээ Бүлүү нэһилиэгин Түгэхтэй алааһыгар Исиидэр Бараахап төрөөбүтэ 125 сыллаах үбүлүөйдээх тэрээһиннэрин чэрчитинэн ыытыллар «АКТИВВЕРВИЛ» ыччат бэстибээлигэр Нам улууһуттан 7 ыччат баран кыттыыны ылла.
Үс күн устата киэҥ программалаах тэрээһиннэр буоллулар. Саамай сүрүнэ — улуустар ыччаттарын кытта биир хамаандаҕа киирэн, улуустарга, бүтүн Саха сиригэр туох саҥаны киллэрэри толкуйдаан, бырайыак көмүскээһинэ буолла. Манна 16 киһилээх Хоро нэһилиэгин баһылыга Альберт Иванов капитаннаах «Күн ыччаттара» хамаанда кыайыылааҕынан таҕыста. Хамаанда Кытай Хэйхэ куоратыгар сынньанарга сертификатынан наҕараадаланна. Бу хамаандаҕа Нам улууһуттан 3 ыччат кытынна: Алина Аммосова (Хамаҕатта), Алина Протопопова (Партизан), Арианда Ефремова (Граф Биэрэгэ).
«Бэстибээл кыттыылаахтарынан Үөһэ Бүлүү, Бүлүү, Ньурба, Нам, Таатта ыччаттара буоллулар, уопсайа 10 хамаанда кииристэ», — диэн иһитиннэрдэ Алина Аммосова.
Мария Винокурова