Нам улууһа спорт кыһыҥҥы көрүҥнэригэр Саха сирин V спартакиадатыгар билиҥҥитэ 6 мэтээллээх иһэр.
Алдаҥҥа улуустааҕы спорт управлениеттан Сергей Софронов, Борис Романов салайааччылаах 30-ка тиийэр спортсмен хайыһарынан куоталаһыыга, биатлоҥҥа, хайыһарынан спортивнай ориентированиеҕа, кыһыҥҥы многоборьеҕа, шорт-трекка, сноубордка, туруору сыыртан түһүүгэ (горнолыжка), хотугу многоборьеҕа кытта сылдьар.
«Бүгүн кулун тутар 28 күнүгэр сноубордка Данилова Дайаана үһүс бочуоттаах миэстэҕэ таҕыста», — диир Сергей Анатольевич.
Туруору сыыртан хайыһарынан түһүү көрүҥэ кулун тутар 27 күнүгэр түмүктэммитин Сергей Софронов чопчулуур. Нам улууһуттан Клавдия Березкина туруору сыыртан түһүүттэн икки кыһыл уонна үрүҥ көмүс мэтээллэри ылбыта. Кини хамаандаҕа аан маҥнайгынан мэтээл аҕалбытын бэлиэтиибит.
Кулун тутар 27 күнүттэн шорт-трек, хайыһарынан спортивнай ориентирование, кыһыҥҥы многоборье көрүҥнэрэ саҕаламмыттар.
Бүгүҥҥү күҥҥэ Нерюнгрига уонна Алдаҥҥа күн-дьыл туруга мөлтөһүөр соҕус диэххэ наада. Ол курдук, киһи эрэ барыта сөбүлүү көрөр биатлонугар Полина Клячина, Лолита Кочнева, Эрэл Тарков, Святослав Слепцов састааптаах хамаанда тыал-куус, хаар быыһынан хайыһарынан сүүрбүт. Эрэл Тарков уолаттарга 2 миэстэни ылбыта этиллэр. Уопсай түмүгүнэн, Нам улууһа биатлоҥҥа Мэҥэ Хаҥаластан бэрт кыһыылаахтык биир очконан баһыйтаран 4 миэстэ буолбут.
Шорт-трегы Анисия Иванова, Евгений Винокуров бүгүн саҕалаабыттар. Ол курдук, эр дьоҥҥо Евгений Винокуров сүүрэн 5-с миэстэ буолбут. Оттон дьахталларга Анисия Иванова 7-с миэстэ.
Оттон Нерюнгрига хоккеистар Хаҥалас хамаандатын 10:7 хотон 7 миэстэҕэ таҕыста. Сарсын кулун тутар 29 күнүгэр фигурнай хаҥкыга Нерюнгри мууһугар Нам улууһун спортсменнара тахсыахтара.
Харысхан Попов