Бүгүн, балаҕан ыйын 2 күнүгэр, алтан чуораан чугдааран, улууспут оскуолаларын аана тэлэччи арыллан, оҕо аймах үөрүүтүнэн кутулунна. И.С. Гаврильев аатынан Намнааҕы 1 №-дээх орто оскуолаҕа 2024-2025 сыл үөрэх дьылыгар элбэх саҥа сүүрээннэр киирээри тураллар, бу туһунан оскуола директора Николай Парников билиһиннэрэр:
— Күндү коллективпын Билии күнүнэн итиитик-истинник барыгытын эҕэрдэлиибин! Саҥа үөрэх дьылыгар элбэх кыайыыны, ситиһиини уонна табыллыыны баҕарабын!
Быйыл ХИФУ-ну кытта үлэбит биир хайысхатынан Университетскай кылаас арыллыыта буолар, ИРОиПК стажировочнай былаһаакката аат иҥэрилиннэ. «Школа Минпросвещения» бырайыак чэрчитинэн, «Беспилотные авиационные системы» федеральнай бырайыак олоххо киириэҕэ. Ону таһынан, Саха тылын уонна литературатын учуутала Лариса Дмитриевна Арассыыйаҕа федеральнай конкурска кыттан өрөспүүбүлүкэ, улуус, оскуолабыт аатын ааттатыаҕа. Оскуолабытыгар түөрт эдэр учуутал үлэлээн саҕалыаҕа. Онтон даҕаны элбэх саҥа сүүрээннэр киириэхтэрэ, үчүгэй уопуппутун чиҥэтэн өссө күүскэ үлэлиэхпит.
Бүгүн Саҥа үөрэх дьылын саҕалыыр линейкабытыгар ааттаан-суоллаан С.Н. Донской аатынан Үөрэҕи сайыннарар уонна идэ таһымын үрдэтэр институт директора Павлов Ньургун Михайлович кыттыыны ылла.
- Өр сыллар устата оҕону иитиигэ үрдүк таһаарыылаах үлэлэрин иһин:
«СӨ Үөрэҕириитин Бочуоттаах ветеран» бэлиэнэн математика учуутала Лидия Рехлясова; - «СӨ Учууталлар учууталлара» бэлиэнэн омук тылын учуутала Светлана Лукина;
- «Наставник учуутал» бэлиэнэн Нюрбина Федорова;
- «Эбии үөрэхтээһин сайдыытыгар кылаатын иһин» бэлиэнэн технология учуутала Елена Гуляева наҕараадаланнылар.
Оскуолабыт чэчирээтин, оҕолорбут саха мааны ыччата буола үөрэнниннэр, учууталларбыт ситиһиилэрэ үксээтин, төрөппүттэрбит төһүү күүс-көмө буоллуннар!
Лена Корякина