Аммосов ааҕыыларын кыайыылаахтара билиннилэр

Нам улууһун Хатырык нэһилиэгэр үгэскэ кубулуйбут норуоттар икки ардыларынааҕы кыттыылаах өрөспүүбүлүкэтээҕи “Аммосов ааҕыылара” ыытылынна.

“Аммосов ааҕыылара” аан бастаан 1989 сыллаахха ыытыллыбыт. Быйыл 5 секциялаах ааҕыыларга 123 оҕо уонна учууталлар кыттыбыттар.

1-8 кылаастар ортолоругар “Уруйдуубут Улуу убайбытын” литературнай-художественнай дьүһүйүү куонкурсугар Намнааҕы 2-с №-дээх орто оскуола 4-с кылааһын үөрэнээччилэрэ: Булатов Айхаан, Исакова Злата, Попов Дамир, Данилов Аман, Попова Аня, Шамаев Бэргэн, Федоров Иосиф — «П.А. Ойуунускай оҕолорго кэс тыла» дьүһүйүүлэрэ кыайыылааҕынан ааттанна.

2 секцияҕа 5-7 уонна 8-11 кылаас үөрэнээччилэрэ арахсан, научнай-исследовательскай үлэлэринэн кытыннылар. И.К. Аммосов аатынан Хатырык орто оскуолатын үөрэнээччитэ Иванов Иннокентий «Максим Кирович Аммосов үлэлээбит сирдэрин картата» дакылаатынан 1 истиэпэннээх дипломунан наҕараадаланна.

8-11 кылаас үөрэнээччилэрин ортолоругар И.С. Гаврильев аатынан Намнааҕы 1 №-дээх орто оскуола үөрэнээччилэрэ Кривошапкина Нарыйана Иннокентьевна, Охлопкова Диана Семеновна “Максим Кирович Аммосов в современной исторической памяти Якутии, на примере памятных открыток о его жизни и деятельности” дакылааттара 1 миэстэни ылла.

3-с секцияҕа М.К. Аммосов ыстатыйаларыгар олоҕуран 9-11 кылаас үөрэнээччилэрэ эссе суруйдулар. Манна М.К. Аммосов аатынан Нерюнгри 2-с №-дээх оскуолатын үөрэнээччитэ Павельева Ольга Михайловна эссетэ бастыҥынан ааттанна.

4-с секция педагогтарга ананна. Н.С. Охлопков аатынан Намнааҕы гимназия учуутала Бочкарева Лена Владимировна «Мой, твой, наш университет» дакылаадынан 1 истиэпэннээх диплому ылла.

Оскуола тыйаатырдара Максим Аммосов доҕоро, государственнай деятель, саха сэбиэскэй литературатын төрүттээбит П.А. Слепцов-Ойуунускай төрөөбүтэ 130 сылыгар аналлаах куонкурска кытыннылар. 5-с секцияҕа И.С. Гаврильев аатынан Намнааҕы 1 №-дээх орто оскуола “Күндүл” улахан бөлөҕүн оҕолоро “П. Ойуунускай айымньыларынан «Мин ырыам ылланыа, мин аатым ааттаныа…” үлэлэринэн кыайыылааҕынан таҕыстылар.

Оскуола иннинээҕи саастаах оҕолор секцияларыгар 20 детсаадтан 39 оҕо уонна 11 төрөппүт бэйэлэрин анал секцияларыгар кытыннылар.

«Үлэ киһини киэргэтэр, идэ киһини сырдатар» секцияҕа 1 Хомустаах “Мичийээнэ” оҕо саадыттан Николаева Аня кыайда.

«Махсыым оҕо сааһа» секцияҕа Хатырык “Кэрэчээнэ” детсаадтан  Николаева Вика бастыҥынан ааттанна.

«Мин оҕом – саха оҕото» үһүс секцияҕа Нам сэлиэнньэтин “Сулусчаан” оҕо саадыттан Уваровская Софья Петровна 1 истиэпэннээх дипломунан наҕараадаланна.

Хаартыскалар: Намнааҕы үөрэх управлениетын сайтыттан